Eshitdik-da: Usmon Toshev U-19 bosh murabbiyi, bu xato emasmi?

Usmon Toshev kuchli mutaxassis, bilimi joyida. Lekin u kishini anchadan beri murabbiylik postida biror natija bajarganini ko'rmay qo'yganmiz. Bundan 10 yilcha oldin "Buxoro"da ishlagan, biroq natijalari pasayib ketgani uchun istefoga chiqqandi. 

Oxirgi paytlarda esa Usmon Toshev asosan O'FA seminarlarida ishtirok etib yurdi. Bu mutaxassis birorta terma jamoada aytaylik maslahatchi murabbiy bo'lib ishlashi mumkindir. Ammo bolalar futbolida bosh murabbiy bo'lishi uchun tajribasi yo'q deb o'ylaymiz. Yoshlar murabbiyi katta klubda ishlashi qiyin bo'lganidek, kattalar bilan yurgan kichiklarga moslashishi qiyin.

Usmon Toshevning U-19 terma jamoamizga bosh murabbiy bo'lishi haqidagi xabar hali rasman chiqmagan va tasdiqlanmagan ham. Bu hozircha faqat eshitganimiz xolos. Malumki, 2019 yilda 2001 va 2004 yillarda tavallud topgan terma jamoalarimiz uchun Osiyo chempionatiga saralash bahslari boshlanadi.

Avvallari bu yoshdagi terma jamoalar ikki yil oldin tayyorgarlik rejasini ishlab chiqardi. SHuning uchun ham biz MDH davlatlari ichida yoshlar hamda o'smirlar o'rtasida jahon chempionatlarida ishtirok etish borasida etakchimiz. Bu natijalarni esa o'sha yoshlar bilan to'g'ri ishlash va samarali selekciya olib borish bilan erishilgan. SHuning uchun ham o'smir va yoshlar terma jamoalariga o'sha avlod bilan tanish bo'lgan mutaxassislar tayinlansa yaxshi bo'lardi.

Yana bir gap. Usmon Toshev o'tgan yil "Andijon"ni boshqarib jamoani Superligaga olib chiqa olmadi. Buning natijasida andijonlik muxlislar qanchalik undan norozi bo'lganini ham bilamiz. Albatta, Usmon Toshev yaxshi mutaxassis, futbolni tushunadi, lekin u kishi ko'proq nazariy bilim berishga, yani futboldan dars o'tishga loyiqroq. Amaliyotda esa bu murabbiy nimadir natija ko'rsatganini hali ko'rmaganmiz. Yurtimizda Toshevga o'xshash murabbiylar bor, masalan Vadim SHodimatov, Islom Ahmedov, SHamil Isaev shular qatorida. Ularga ko'proq futbol metodikasidan dars berish yoki murabbiylarni o'qitish yarashadi.

SHu o'rinda O'FAga taklifimiz qaysi yoshdagi terma terma jamoa bo'lmasin, bosh murabbiy tayinlayotganda etti o'lchab bir kesgan maqul. CHunki murabbiy natija ko'rsatish bilan birga o'sha yoshdagi bolalarning kelajagi uchun javobgar bo'ladi. Avvalgi O'FF tarkibida murabbiylar kengashi bo'lardi. Hozir O'FAda shu bormi-yo'qmi, bilmaymiz. To'g'ri, avvalgisi ham malum bir murabbiylar brigadasini turli yoshlarda aylantirib yurgan. Lekin harqalay natija bo'lgandi.

Aslini olganda birorta terma jamoaga murabbiy tayinlashdan oldin o'sha murabbiyning mahorati va uning tarkib bilan qanchalik tanishligi o'rganib chiqiladimi yoki ishsiz, bekor yurgan murabbiyga terma jamoa sinov maydonchasi qabilida berilaveradimi? Futbolda yaxshi murabbiy hech qachon bekor yurmaydi, shuning uchun ham ayniqsa kichik yoshdagi terma jamoalarga bosh murabbiy tayinlayotganda shu kabi omillarga jiddiy ahamiyat bersak yaxshi bo'lardi. 

Endi bu shunchaki jurnalist sifatida o'z qarashlarim xolos. Yanayam anig'ini futbolimiz rahbarlari biladi. Natijaga javobgar esa baribir bosh murabbiy bo'lib qolaveradi.

X.Xoliqov.