Ertaga OFKning “Ommaviy-bolalar futboli kuni”ga bag'ishlangan festival bo'lib o'tadi

Festival davomida yosh ishtirokchilar maydonda o'zlarining mahoratlarini namoyish etadilar. Ishtirokchilar guruhlarga bo'linadilar va har bir guruhga alohida murabbiy tayinlanadi. So'ngra har bir guruh o'ziga ajratilgan maxsus jihozlangan joylarga borib, murabbiylari bilan birgalikda estafeta, to'p muomalasi, to'pni qo'lda o'ynash, yugurish hamda to'p nazorati bo'yicha  mashg'ulotlar o'tkazishadi.

Futbol festivali davomida murabbiylar ishtirokchilarni futbolning sir-asrorlari bilan tanishtirishadi. Tadbir so'ngida ishtrokchilar sertifikat bilan taqdirlanadilar.

Qayd etish zarurki, bunday tadbirlar yosh sportchilarga katta sportga o'zlarining ilk qadamlarini qo'yishlarida hamda bo'lajak musobaqalarga tayyorlanishlarida dasturul amal bo'lib xizmat qiladi.

Avval xabar berib o'tganimizdek, O'zbekiston ikkinchi marotaba “Futbol do'stlik uchun” keng qamrovli ijtimoiy loyihasida ishtirok etadi. Ushbu loyiha doirasida butun dunyo bo'ylab “Futbol va do'stlik” kuni nishonlanadi. Butun dunyo bolalari va ularning ota-onalari ushbu bayram munosabati bilan o'tkaziladigan futbol bilan bog'liq turli tadbirlarda qatnashadilar.

Toshkentda “Futbol va do'stlik” kuni OFKning “Bolalar ommaviy futboli kuni”ga bag'ishlangan futbol festivali doirasida o'tkaziladi.

Ushbu futbol festivalida “Futbol do'stlik uchun – 2018” dasturining O'zbekistondagi yosh elchilari — “Bunyodkor” futbol maktabining o'quvchisi, darvozabon Muslim Abdumannopov hamda yosh jurnalist Mardon Marupov ishtirok etadilar.

Tadbir so'nggida yosh elchi hamda jurnalist festival davomida tanishgan ko'plab do'stlarining qo'llariga do'stlik bog'ichlarini taqib qo'yadilar.

Eslatib o'tish joizki, “Futbol do'stlik uchun” bolalar ijtimoiy loyihasi “Gazprom”ning “Gazprom - bolalarga” dasturi doirasida tashkillashtiriladi. Ushbu loyihaning maqsadi – bolalar futbolini rivojlantirish, bag'rikenglik tuyg'usini shakllantirish, turli mamlakat yoshlari o'rtasida do'stlik o'rnatishdir. Ishtirokchilar targ'ib qiladigan asosiy qadriyatlar – do'stlik, tenglik, adolat, sihat-salomatlik, tinchlik, sadoqat, g'alaba va urf-odatlardir.