Eldor Moyliev: "Ikkinchi daqiqadayoq qizil kartochka bilan jazolandik va rejamiz o'zgarib ketdi"
24 may 23:50
Yangiliklar

Eldor Moyliev: "Ikkinchi daqiqadayoq qizil kartochka bilan jazolandik va rejamiz o'zgarib ketdi"

Superliga 11-turidan o'rin olgan "Neftchi" - "Sho'rtan" (4:0) uchrashuvidan so'ng mehmonlar bosh murabbiyi Eldor Moyliev matbuot anjumanida ishtirok etdi.

"Neftchi"ni yaxshi o'rganib chiqqan edik. Ikkinchi daqiqadayoq qizil kartochka bilan jazolandik va rejamiz o'zgarib ketdi. "Neftchi"ga qarshi bir kishi kam bo'lib o'ynash qiyin. Futbolchilar oxirigacha kurashishdi. Raqib o'z imkoniyatlaridan foydalandi va g'alaba qozondi. Ularni g'alaba bilan tabriklayman", - dedi Eldor Moyliev bugungi bahs haqida.

- Qizil kartochka o'yin rejasiga qanchalik tasir o'tkazdi?

- Raqibimiz qanday o'ynashini bilar edik. Lekin 10 kishi bo'lib qolganimizdan so'ng 4-4-1 sxemasida o'ynadik. "Neftchi" qanotlarda faol ekanligidan xabardor edik. Shu sababli 5-4 uslubiga o'tib oldik, ammo hujumga chiqishga ancha qiynaldik. Tanaffusdan so'ng yana 4-4-1ga o'tib, qarshi hujumda o'z omadimizni sinab ko'rish uchun.

- Darvozabon zaxiraga olinganiga nima sabab bo'ldi?

- Darvozabonimiz jarohat oldi va shuning uchun uni zaxiraga oldik.

- Kamron Saidazimov va Nuriddin Hasanovlar zaxirada qoldirildi. Bunga sabab nimada?

- Kim yaxshi sport formasida bo'lsa, shunga imkoniyat beramiz. Yaqinlashib kelayotgan FIFA kunlarida tayyorgarlik ko'ramiz. Kim jismoniy jihatdan yaxshi holatda bo'lsa, o'sha futbolchi imkoniyatga ega bo'ladi.