Ekspert fikri. Murod Ismoilov: "Neftchi" chempionlikka katta qadam tashladi, "Nasaf" osonlikcha taslim bo'lmasa kerak"

Farg'ona mezbonlik qilgan "Neftchi"  - "Nasaf" uchrashuvida mezbonlar 1:0 hisobidagi g'alabani tantana qildi. Bu orqali Vitaliy Levchenko shogirdlari raqibi bilan ochkolardagi farqni qisqartirib oldi va chempionlik uchun kurashda davom etadigan bo'ldi. Mazkur uchrashuv yuzasidan tajribali mutaxassis va murabbiy Murod Ismoilovning fikrlarini tingladik. 

"Olti ochkolik o'yinda "Neftchi" g'alaba qozondi. Bu g'alaba bilan barcha farg'onalik muxlislarni tabriklayman. "Nasaf" jamoasiga keyingi o'yinlarda omad tilayman. 

Kurashga boy va kuchli o'yin bo'lganligi ko'rinib turdi. "Nasaf" o'yin nazorati, uzatmalar aniqligi, burchak to'plari borasida ustunlik qilgani malum, lekin natijada yagona penaltidan urilgan gol o'yin taqdirini hal qildi. Bu erda muhimi statistika yoki chiroyli o'yin emas, g'alaba. Shaxsan viloyat hokimimiz o'yindan oldin katta motivaciya bergandilar. O'yinni bevosita stadiondan kuzatdilar va xursandchiliklarini muxlislar bilan baham ko'rdilar. Bu chempionlik uchun katta qadam deb hisoblayman. "Neftchi"ga navbatdagi o'yinlarda ham g'alabalar tilayman. Yigitlardan shu ruhda davom etishlarini so'rab qolaman. 

"Nasaf" hali o'z so'zini aytadi, bu jamoa doim yuqori natijalarga intilib kelgan. Shunday ekan chempionlikni osonlikcha topshirib qo'ymasa kerak deb o'ylayman. Ro'ziqul Berdiev va uning jamoasi oxirigacha kurashadi. Futbol muxlislarini yana bir bor tabriklab qolaman",- deydi Murod Ismoilov.