ECHL. Bugungi "Real" oltinchi bo'la oladimi?

SHu kungacha beshta jamoa Evropa CHempionlar Ligasining guruh o'yinlarida mag'lubiyatga uchramagan. Quyida mana shu jamoalarni esga olib o'tamiz.

"Milan" (1992/93). Yutuq: 6. Durang: 0. Mag'lubiyat: 0. To'plar nisbati: 11-1.

O'sha yili "Olimpiya", "Slovan", "Geteborg" bilan bir guruhdan o'rin olgan milanliklar guruh o'yinlarining barchasida g'alaba qozonganlar.

Keyingi to'rtta o'yinda esa jamoa bir to'p farqi bilan g'alabali seriyani davom ettirgan. Lekin, final bahsida Marselning "Olimpik" jamoasiga kichik hisobda imkoniyat boy berilgan. 

"Pari Sen-Jermen" (1994/95). YU: 6. D:0. M: 0. T-N: 12-3.

Dastlabki o'yinda Jorj Vea hamda Daniel Bravoning gollari evaziga "Bavariya"dan ustun kelgan parijliklar guruh o'yinlarini bir nafasda bosib o'tishdi. Kievning "Dinamo" hamda Moskvaning "Spartak" jamoalari ustidan qozonilgan g'alabalar PSJning yaqqol guruh favoriti ekanligini bildirardi.

Keyinchalik esa pley-offda "Barselona"ning to'qnash kelishi g'alabali seriyaning yakunlanishiga sabab bo'ldi. Ikki o'yin natijasiga ko'ra kataloniyaliklar to'sig'idan bir amallab o'tib olgan jamoa keyingi bosqichda "Milan"ga to'qnash keladi. Parijliklar ikkita o'yin natijasiga ko'ra 0:3 hisobida imkoniyatni boy berganlar.

"Spartak" (1995/96). YU: 6. D:0. M: 0. T-N: 15-4.

Moskvaliklar o'sha yili "Blekbern", "Rusenorg" hamda "Legiya" jamoalari bilan bir guruhdan o'rin olganlar. Norvegiyaliklarga qarshi o'yinda "Spartak" ikkita to'p farqi bilan ortda borayotib, 4:2 hisobidagi g'alabani tantana qilganini ko'pchilik yaxshi eslaydi.

Jamoaning g'alabali seriyasi "Nant"ga qarshi chorak final o'yinida o'z yakuniga etadi. Safarda 0:2 hisobida yutqazgan moskvaliklar o'z maydonida 2:2 hisobida durang o'ynaganlar. Ammo bu ECHLda ishtirokni davom ettirish uchun kamlik qilardi.


"Barselona" (2002/03). YU: 6. D:0. M: 0. T-N: 13-4.
2002 yilning 18 sentyabrida "Bryugge"ni 3:2 hisobida mag'lub etgan "Barsa" ECHLda o'zining ketma-ket to'qqizinchi g'alabasini nishonlagan. Ushbu rekord 2013/14 yilgi mavsumgacha saqlanib qolingan. So'ngra "Bavariya" tomonidan natija yangilangan.

"Bryugge", "Galatasaroy", "Lokomotiv"lar bilan bir guruhdan o'rin olgan kataloniyaliklar eng yaqin taqibchilarini 11 ochkoga ortda qoldirishga muvaffaq bo'lganlar.

Ikkinchi guruh bosqichida esa klub "Bayer", "Nyukasl" va "Internacional" jamoalari bilan o'yinda navbatdagi g'alabalarni o'z hisoblariga qo'shib qo'yganlar. G'alabali seriya "Inter" bilan safar o'yinida yakuniga etgan. Undan so'ng ham kataloniyaliklar bir qancha o'yinlarda g'alaba qozonganlar. Ammo, chorak finalda "Yuventus" to'sig'idan o'ta olmaganlar.


"Real" (2011/12). YU: 6. D:0. M: 0. T-N: 19-2.

"Real" ikki marotaba guruh bosqichidagi o'yinlarining barchasida g'alaba qozongan ilk jamoaga aylanishi mumkin. Birinchi natija uch yil oldin qayd etilgan. O'shanda madridliklar yaqin taqibchilarini 10 ochkoga ortda qoldirib ketgandilar. Avvaliga Zagrebda "Dinamo" 1:0 hisobida taslim etiladi. Keyin esa "Ayaks", "Lion" jamoalari 3:0, 4:0 hisoblarida mag'lub etilgan.  Ikkinchi davra ham madridliklar uchun omadli bo'lgan. 

G'alabali seriya nimchorak finalda Moskvada o'z yakuniga etadi. Klub CSKAga qarshi o'yinda durang qayd etgan. Madridliklar o'sha yili yarim finalda "Bavariya"ga qarshi o'yinda penaltilar seriyasida imkoniyatni boy berib qo'ygandilar.

Aziz To'xtamurodov tayyorladi