Doniyor Usmonov: “Neftchi”ga qarshi bahsda bosimsiz o'ynadik”

Mazkur g'alaba qo'qonliklarning o'z tarixidagi “Neftchi” ustidan qozonilgan ikkinchi g'alabasi bo'ldi. Yodingizda bo'lsa 2014 yili Qo'qonda kechgan O'zbekiston Kubogi doirasidagi bahsda “shunqorlar” pealtilar seriyasida farg'onaliklarni mag'lubiyatga uchratgandi. Kechagi muvaffaqiyat esa ularning chempionatdagi ilk g'alabasi bo'ldi. Uchrashuvda “Qo'qon-1912”ga g'alaba keltiruvchi gol muallifi bo'lgan Doniyor Usmonov o'yin haqida o'z fikrlarini bildirib o'tdi.

- Doniyor, avvalo tarixiy g'alaba bilan tabrkilaymiz. Uchrashuv xususida fikringiz qanday?
- Tabrik uchun tashakkur. Garchi g'alaba qozongan bo'lsakda, uchrashuv juda ham qiyin kechdi. Mezbonlar o'z maydonida osonlikcha ochko ulashib yuboradigan klub emas. Buni o'yin davomida bilish qiyin kechmadi. To'g'risi, omadimiz keldi. Farg'onaliklar butun o'yin davomida hujum uyushtirgan bo'lsa, biz esa birgina vaziyatdan unumli foydalanib qoldik. SHu tariqa g'alabaga erishdik.

- “Qo'qon-1912” chempionat doirasida shu kungacha “Neftchi”ni mag'lub eta olmay kelayotgandi. Bundan xabaringiz bormidi?
- Albatta, o'yindan avval bu haqda saytingizdagi o'qigandim. Tarixni yangilash uchun bor kuchni sarfladik. Derbi o'yinlari doimo murosasiz va jangavor ruh ostida o'tadi. “Neftchi” bilan bahs ham kutilganidek murakkab kechdi. Lekin qora ananaga chek qo'yganimizdan xursandmiz.

- G'alaba nimani hisobiga qo'lga kiritildi deb o'ylaysiz?
- Bilasizmi biz “Neftchi”ga qarshi bahsda hech qanday bosimsiz xarakat qildik. Oliy ligadan tushib ketish yoki qolish to'g'risida emas, uchrashuv haqida o'yladik. Murabbiylar ham bahsdan oldin hotirjamlik bilan o'ynab, o'zimizni ko'rsatishimiz kerakligini aytgandi. G'alabamizning yana bir muhim omili deb esa ahillikni aytgan bo'lardim. Barchamiz bir-birimizni qo'llab-quvvatlagan xolda to'p tepdik.

- Derbidagi yagona golni kiritdingiz. Bu juda yoqimli bo'lsa kerak?
- Juda ham. Har bir bahsdan oldin maydonga gol urishni niyat qilib tushaman. Yaratganga shukur kecha gol urib, jamoamga muhim ochkolarni taqdim etdim.

Islombek Rustambekov suhbatlashdi.