Diyor Imomxo'jaev: "Jamoaga transfer taqiqi qo'yilgan bo'lsa, murabbiy qaysi asosda yangi futbolchilarni sinovdan o'tkazyapti?"
15 jan 2021 12:53
Yangiliklar
![](https://championat.asia/upload/storage/614395_original.jpg)
![](/upload/storage/614395_220.jpg)
Diyor Imomxo'jaev: "Jamoaga transfer taqiqi qo'yilgan bo'lsa, murabbiy qaysi asosda yangi futbolchilarni sinovdan o'tkazyapti?"
Futbol muxlislari turli savollar bilan murojaat qilishadi. Ularning hammasiga o'z vaqtida javob berish uchun vaqt yo'q, ammo hech bir savol baribir javobsiz qolib ketmaydi. Pandemiyadan keyin musobaqalarni yakunlash va mana endi yangisini boshlash arafasida ish ko'p. SHuning uchun ham Futbol-TV bilan tanaffus yuzaga keldi. Hozir mavzu bu haqda emas. Mavzu — har qanday muxlis ortga nazar tashlab, bugun bo'layotgan voqealarni muhokama qilib ko'rishida. Bu esa ko'plab savollarga javob topish imkonini beradi.
Birinchi navbatda o'z jamoangiz mavsumni qanday yakunlagani haqida o'ylab ko'ring. Agar kattagina qarzdorlik qolib ketgan bo'lsa, bu nimaning oqibatida kelib chiqqanini mushohada qiling. O'tgan davr davomida jamoangiz poydevorni shakllantirishga ko'proq urg'u berdimi yoki asosiy jamoaning ligadagi o'rni haqida ko'proq o'yladimi?
Jamoangiz safida to'p surgan legioner futbolchilar siz kutgan natijani berdimi? Bermagan bo'lsa bunga kim javobgar? Murabbiy yaxshi selekcioner bo'lmasa, nimaga asoslanib o'sha futbolchilar olib kelindi? Bu futbolchilar uchun qancha pul to'landi-yu, futbol maktabiga, yani, barchamizning farzandlarimizni tarbiya qiladigan makonga qancha sarflandi?
Qandaydir murabbiy jamoaga kelayotgan bo'lsa, shu murabbiy avvalgi klublarida qanday ishlagandi va kimlar bilan ishlagandi? Ular birgalikda o'sha jamoaga nima bergandi? Jamoangizga transfer taqiqi qo'yilgan bo'lsa, u qaysi asosda yangi futbolchilarni sinovdan o'tkazyapti? Nahotki FIFA taqiqi bilan o'ynashish mumkin bo'lsa?
Siz necha yillardan buyon quyosh nurlari ostida futbol tomosha qilasiz? Nega jamoa muxlislarni yoki futbolchilarni o'ylab, yoritish tizimini yaxshilash haqida o'ylamayapti? Nega Nasaf, Lokomotiv, Paxtakor yoki Navbahor stadionida translyaciyalar chiroyli chiqadi, futbolchilar chiroyli futbol namoyish qiladi? Balki sizning jamoangiz ham maydon chimiga etibor qaratsa, sizda ham mana shunday hujumkor futbollarni ko'rish imkoniyati oshmasmikin?
Biz o'qiyapmiz, yig'inlar boshlanyapti, yig'inlarni hamma chiroyli bo'lgani uchun emas, o'z uyida sharoit kam bo'lgani uchun poytaxtda o'tkazayotgan bo'lishi mumkin. Ertaga shu klublar maydoniga taqiq qo'yilsa, ular biz stadionni yaxshilamagan edik demaydi, ular barcha barmoqlari bilan O'zPFL manzilini ko'rsatadi. Yig'inlarda yana o'sha notanish legionerlar. Vaholanki milliy terma darajasidagi murabbiylar ham ikki yildan buyon tuzukroq legionerni tanlolmaydi, biroq ularda asl jamoaga futbolchi tanlash imkoniyati bor.
Moziyga qaytib ish ko'rish — xayrli. Bizga yillar davomida tariximiz bilan g'ururlanishni o'rgatishdi. Ammo biz tarix g'ururlanish uchun emas, saboq chiqarish uchun ekanini hech tushunib etmayapmiz", - deb yozadi PFL bosh direktori vazifasini bajaruvchi Diyor Imomxo'jaev telegramdagi o'z kanalida.
Eslatib o'tamiz, Legioner futbolchilar bilan muammolari mavjud bo'lgan, buning oqibatida FIFA tomonidan taqiq qo'yilgan klublar xorijiy futbolchi va murabbiylarni ro'yxatdan o'tkaza olmaydi. Ayni paytda "Qo'qon-1912", "Surxon", "Andijon" va "SHo'rtan" klublariga FIFA tomonidan taqiq mavjud. "Bunyodkor" va "Navbahor" klublarining qarzdorlik bilan bog'liq ishi sport arbitraj sudi tomonidan ko'rib chiqilmoqda. "Andijon" klubi matbuot xizmati xabariga ko'ra, legionerlardan qolib ketgan qarzdorliklar to'liq yopilgan.
O’xshash yangiliklar
![AMP Logo](https://championat.asia/image/logo-amp.png)
Fikrlar