Dilshod Nuraliev: “Terma jamoamizdan 1994 yilgi chempionlikni takrorlashini kutib qolamiz”

Afg'onistonga qarshi o'yin oldidan taniqli mutaxassis Dilshod Nuralievning fikrlarini bilishga qiziqdik.

- Dilshod aka, olimpiya terma jamoamizning Osiyo o'yinlarida o'tkazayotgan uchrashuvlarini ko'rish imkoni bo'lyaptimi?
- Ha, albatta. Guruhdagi ikkita o'yinni ko'rdik.

- Xo'sh, bu borada ortda qolgan o'yinlardan so'ng sizda qanday xulosalar paydo bo'ldi?
- Bilasizmi, guruhimizdagi raqiblarning saviyasi nisbatan biznikidan pastroq. SHuning uchun ular himoyaviy taktikani qo'lladi. Asosan qarshi hujum ostida to'p tepdi. Ochig'i, bunday raqiblarga qarshi o'yinlar doimo qiyin kechadi. Lekin terma jamoamiz imkon qadar muxlislarni xursand qilishga harakat qilayotgani ko'rinib turibdi.

- Bugungi o'yin oldidan nima deya olasiz?
- Faqat g'alaba qozonishiga tilakdoshmiz. Buning uchun ekran qarshisidan bo'lsa ham xamyurtlarimizni qo'llab-quvvatlaymiz va Yaratgandan ijobiy natijaga erishishini so'rab qolamiz. Afg'oniston bilan o'yin qiziqarli o'tadi deb tahmin qilaman. Umid qilamizki, bugun yigitlar murabbiyning bergan ko'rsatmalarini bexato bajaradi va yirik hisobda g'alabaga erishadi.

- Finalga qadar borish imkoniyatimizni qanday baholaysiz?
- Sizga hozir bu borada tayinli gap aytishim qiyin. Sababi futbolda hamma narsa bo'lishi mumkin. Imkoniyatlardan unumli foydalanib, har bir o'yinda g'alaba qozonishimizni juda-juda istaymiz. Yigitlarimizda xalqaro tajriba etarli. Xalqimiz ulardan 1994 yilgi chempionlikni takrorlashini kutmoqda. Bunga erishsa bo'ladi. Bu yo'lda terma jamoamizga omad va zafarlar yor bo'lishini tilab qolamiz.

- Nima deb o'ylaysiz, mazkur musobaqadan so'ng qaysi futbolchilarimiz xorij klublariga ekspert qilinishi mumkin?
- Olimpiyada o'yinlarida futbol yarmarkasi u qadar katta bo'lmaydi nazarimda. Menimcha kelasi yil Avstraliyada bo'ladigan Osiyo chempionatida xorijlik skautlar soni ko'p bo'ladi. Extimol hozir Incheonda ham futbolchilarni mutaxasisslar kuzatishayotgandir. Agar shunday bo'lsa, “Paxtakor”ning iqtidorli o'yinchilari Egor Krimec, Jamshid Iskandarov hamda Igor Sergeev kabi o'yinchilar xorij klublariga o'tishi mumkin.


Islombek Rustambekov suhbatlashdi.