Dilshod Nuraliev: “Asadov kuzatuvimiz ostida”

SHundan so'ng ushbu mutaxassis bilan suhbatlashib, Firdavs Asadov xususida ham so'radik.

- Dilshod aka, avvalo sport ustozi ordeni bilan taqdirlanganingiz bilan qutlaymiz.
- Rahmat katta, bu faqat birgina mening yutug'im emas, barchamizniki.

- Sizdan bugungi kunda birinchi liga to'purari bo'lib turgan Firdavs Asadov haqida so'ramoqchi edim. “Spartak” hujumchisi to'g'risida malumotga egamisiz?
- (Biroz o'ylanib) Ha, albatta Asadovni juda yaxshi bilaman. Uni bundan ikki yil oldin topganmiz. Yodingizda bo'lsa, o'tgan yili Firdavsni yig'inlarga taklif etib, Yaponiya o'smirlar terma jamoasiga qarshi kechgan bahslarda sinab ko'rganmiz. Bu yil “Spartak” safida hujumchining o'yinida o'sish ko'zga tashlanmoqda. Uning insoniylik jihatlariga gap yo'q. Menga ham yoqadi. Harakatlari yomon emas, o'sadigan yigit. Faqat buning uchun o'z ustida ishlashni susaytirib yubormasa bo'lgani.

To'g'ri, Asadovni bu yilgi yig'inlarimizga chaqirmadik. Lekin futbolchi kuzatuvimiz ostida. Bilaman bu yil Firdavs to'purarlik mahoratini namoyish etmoqda. Lekin birinchi liga bilan terma jamoa o'rtasidagi saviya bir-biridan farq qilishini unutmaylik Hozir hujum chizig'ida bir nechta yigitlarni sinab ko'rmoqdamiz. Masalan Akobir To'raev bor. Bu yigit “Buxoro”ning asosiy tarkibi bilan mashg'ulotda qatnashadi. Yoshlar ligasida jamoasining boshlang'ich tarkibida o'ynab kelmoqda. SHuningdek “Mashal”dan markaziy hujumchi SHoxjahon Abbosov, “Lokomotiv”dagi sof hujumchi Abbos Nematullaev hamda “Nasaf”dan Dilshod Xushbekovni taklif etganmiz. Bu futbolchilar yoshlar ligasida o'ynaydi. Albatta Asadovni yuqorida aytib o'tganimdek, kelgusida yana kuzatamiz. Uning ham vaqti keladi, shunda imkoniyat beramiz.  

Islombek Rustambekov suhbatlashdi.