Depay: "Men moliyaviy sharoitlarni emas, orzuimni tanladim"

- Transferga oid mish-mishlar ko'paygan so'nggi haftani qanday o'tkazdingiz?

- Bu vaqt oralig'i juda notinch o'tdi, chunki men top-klublardan birini tanlashim kerak edi. Ammo "Manchester Yunayted" orzuimdagi yagona klub, shu sabab do'stlarim yoki yaqin insonlarimdan maslahat so'raganim yo'q.

Endi esa terma jamoadagi do'stlarim va "Manchester Yunayted"da yig'ilgan kuchli futbolchilar bilan maydonga chiqishga sabrim chidamayapti. Lui van Gal kabi buyuk mutaxassis bilan ishlash - bu katta bonus.

- Siz bilan juda ko'p klublar qiziqdimi?

- Ha, ko'p, ammo bir vaqtning o'zida matbuotda paydo bo'lgan mish-mishlarga ishonmaslik kerak. Men moliyaviy sharoitlarni emas, orzuimni tanladim.

- Siz PSVda qolib, jamoaga CHempionlar ligasida yordam berish haqida o'yladingizmi?

- PSVda nafaqat futbol sirlarini balki insoniylikni ham o'rgandim. Klubdan barchasi uchun minnatdorman, ammo jamoani tark etish vaqti kelganini sezdim. "Manchester Yunayted" taklifiga shunchaki nazar tashlab qo'yishning iloji yo'q.

PSV bilan qo'lga kiritilgan chempionlikdan xursandman. Muxlislar bunga munosib edi.  Klubga kelasi mavsumda eng yaxshi niyatlarimni tilab qolaman va PSV chempionlikni himoya qilishiga umid qilaman.

Depayning agenti Kis Ploegsma ham kichik intervyu berdi:

- Yaqin vaqt ichida biz tibbiy ko'rikdan o'tib, qog'ozbozlik bilan shug'ullanishimiz kerak. Memfis bu boshlanishi ekanligini yaxshi biladi va uning faoliyati chiroyli xotiralar bilan to'lishi uchun Depay bor kuchi bilan mehnat qilishi kerak".