Denni Merfi: "Brunusiz MYUga osonroq bo'ladi"

Mankunianliklar sardori diskvalifikaciya sababli bugungi uchrashuvni o'tkazib yuboradi.

"Uning diskvalifikaciyasi o'yinga reja tuzishda murabbiyga engillik yaratadi. Brunu - ajoyib futbolchi, biroq "Enfild"da tarkib tuzayotganda ten Xag uni kengroq yo'nalishda ishlatishi kerak bo'lardi.

Usiz "Yunayted" zich himoya tuza oladi, 3 nafar yarim himoyachi Sofyan Amrabat, Kobbi Maynu va Skott Maktominey bilan u ikki qavatli himoya hosil qila oladi va Markus Reshford, Alexandro Garnacho hamda Antonini tezkor qarshi hujumda ishlatadi.

Agarda Brunu markazdagi biror poziciyani egallaganida hujumlar unchalik tez bo'lmasdi. Maktominey esa oldinga harakatlana oladi  va Rasmus Xeylundga yordam berishi mumkin.

Agarda ten Xagning o'rnida bo'lganimda Reshfordni asosiy tarkibda sardorlik bog'ichi bilan maydonga tushirardim. Balki bu gaplarim ayrim muxlislarga yoqmasligi mumkin, ushbu mavsumda jamoaning eng yomon holatiga kelib qolishiga murabbiy aybdor bo'lsa-da, u qo'l ostida eng yaxshi holatdagi futbolchilarni tushirishi kerak.

Antoni va Garnachoni asosiy tarkibda almashtirmasdan o'ynataverish ham yaxshi emas. Garnacho mavsumni yaxshi o'tkazmoqda, biroq so'nggi vaqtlarda uning harakatlarini oldindan o'qiy olishmoqda. Balki hamma ishni o'ng qanotga tashlab, Reshfordni chapda yashirin qurol sifatida ishlatish kerakdir", - deb yozadi "Liverpul"ning sobiq futbolchisi.