Davron Karimqulov: "Ijobiy natijalarning omili mehnat"

Bu mavsum ko'z tegmasin jamoamiz juda hamjihatlik bilan ishlayapti va kerakli ochkolarni jamg'arayapmiz. Bunda albatta murabbiylar shtabimizning tinimsiz izlanishlari, qolaversa jamoadoshlarimning berilayotgan ko'rsatmalarni to'liq va aniq bajarib borayotganligida deb bilaman. Ijobiy natijalarimizning omili esa tinimsiz izlanish va mehnat samarasidir. Bu yilgi mavsumda o'yinlar yanada shiddatli, murosasiz o'tayotganligini ko'rib turibsiz. Jamoalar xoh o'z uyida bo'lsin, xoh safarda bo'lsin yuz foizlik natija uchun kurash olib borishmoqda. Buning natijasida esa muxlislarga tomoshabop, mazmunli o'yinlar tortiq etilyapti. Birinchi davraning uchdan ikki qismi ortda qoldi. Peshqadamlar safida borayotganligimizdan mamnunmiz. Ammo xotirjamlikka berilmasligimiz lozim. Oldinda “Bunyodkor”, “Lokomotiv”, “Navbahor”, “Neftchi” singari kuchli raqiblarga qarshi o'yinlar bizni kutib turibdi. Davralar oralig'idagi tatilga hozirgidek yuqori kayfiyatda chiqib ketishni istaymiz.

Bevosita bugungi o'yinga to'xtaladigan bo'lsam, uchrashuv biz uchun juda qiyin kechdi. “Andijon”ga ochko suv va havodek zarur edi. Ular Bekobodga uch ochko olish uchun kelishganliklarini amalda isbotlashdi. Biroq omad shu kuni biz tomonimizda bo'ldi. Biz yaratilgan imkoniyatlardan raqibga nisbatan unumli foydalandik. Jamoamizning tajribali o'yinchilari Hikmat Hoshimov, Dilmurod Karimov, Zohid Abdullaevlar yoshlarga har tomonlama o'rnak bo'lishdi. Yoshlarimiz ham qarab turishmayapti, faolliklari bilan muxlislarimizni xursand etishmoqda.   

Andijon xalqi futbolni juda sevadi. Jamoaning ashaddiy muxlislari o'yin qaerda bo'lmasin albatta etib boradi va “Andijon”ning o'n ikkinchi o'yinchisi sifatida futbolchilariga dalda berib turishadi. Men “Andijon”ga keyingi uchrashuvlarida omad yor bo'lishini tilayman, deydi Davron Karimqulov.

"Metallurg" matbuot xizmati