Davron Fayziev: “Uch kun ichida ikkita jiddiy raqib bilan o'ynash osonmas”

-Mezbonlarni g'alaba bilan tabriklayman, - deya so'z boshladi Davron Oripovich. - “Qizilqum” yuqori saviyadagi ijrochilarga ega jamoalardan sanaladi. SHunga qaramay, biz Navoiydan hech bo'lmasa bir ochko olib ketish ilinjida kelgandik. Afsuski, uch kun ichida ketma-ket ikki jiddiy raqibga qarshi o'ynash oson emas. “Nasaf” bilan o'yinda uchralgan yirik hisobdagi mag'lubiyatdan so'ng, yigitlarimizning o'zlariga kelishi qiyin bo'ldi.

Himoyadagi palapartishlikdan raqib hujumchilari unumli foydalanishdi. Umuman olganda, yigitlarimiz maydonda yomon harakat qilishmadi. Garchi, ularning xatti-harakatidan ko'nglim to'lgan bo'lsa-da, yakuniy hisob baribir dilimizni xira qildi.

Nima deymiz, hayot davom etadi. Bu - futbol! Jizzaxda istedodli yoshlar ulg'ayishmoqda. Ularning kelajagi uchun ham ishlashimiz kerak. Endi jamoamiz tatilga chiqadi. Dekabrning  ikkinchi yarmidan yangi mavsum tayyorgarligini boshlaymiz.

“Qizilqum” PFK Matbuot xizmati.