Davron Fayziev: “Saviyamiz Xitoynikidan past bo'lsa, JCHga chiqib nima qilamiz?”

Suhbatimiz asosan boks va futbol mavzusida kechib, hamkasbimiz o'zining dilidagi gaplari bilan o'rtoqlashdi. Quyida etiboringizga Fayzievning milliy terma jamoamizning oldinda turgan ikkita o'yini haqida bildirgan fikrlarini havola qilamiz.

- Davron, hozirda ko'pchilik milliy terma jamoamiz bosh murabbiyini taktikasining yo'qligida, o'yinning borishiga qarab, o'zgartirib yuborish qobiliyatiga ega emasligida ayblayapti. Bu masalada fikringiz qanday?

- Xitoy terma jamoasini shu paytgacha ham mag'lub etganmiz va bu borada ortiqcha muammoga duch kelmaganmiz. Bu safargi o'zaro to'qnashuvimizda ham g'alaba qozonishimizga ishonyapman. Garchi, chin yurti jamoasiga Marchello Lippi ustozlik qilayotgan bo'lsa ham.

- To'g'riku-ya, lekin italiyalik tajribali mutaxassis qisqa fursatda Xitoy terma jamoasi o'yinini ijobiy tomonga o'zgartira oldi...

- Fikringizga qo'shilaman. SHunchaki, Lippi shu kungacha o'z darajasidan past o'yin namoyish etgan Xitoyni asl darajasiga olib chiqa oldi. Ammo, baribir boshdan baland sakrab bo'lmaydi. Hozirgi Xitoy darajasini O'zbekiston terma jamoasidan ustun deb hisoblamayman. Agar saviyamiz Xitoynikidan past bo'lsa, unda jahon chempionatiga chiqib nima qilamiz? Tarkibimizdagi futbolchilarning aksariyati tajribali va yoshi katta. Ularda hech qanday qo'rquv xiss yo'q. Ularga kayfiyatni bera olish kerak, xolos. Uni kim beradi? Albatta, bosh murabbiy.

- Keling, maydonni shaxmat doskasiga qiyoslaymiz. Uning ikki tomonidan grossmeysterlar, yani bosh murabbiylar joy olishgan. SHaxmat taxtasidagi sipohlar esa futbolchilar. Ikki grossmeyster - Lippi va Babayanning taktik yurishida kimni ustun hisoblaysiz?

- Lippi jahon futbolida olamshumul yutuqlarga erishgan. Marchelloning Italiyani jahon chempioni qilganining o'zi ko'p savollarga javob beradi. SHaxsiy fikrim, bu o'yinda ko'p narsa futbolchilarning o'ziga bog'liq bo'ladi. Agar ular chindan ham jahon chempionatiga chiqishni istashsa, Xitoyni mag'lub etishadi. Aks holda, u erdan quruq qo'l bilan qaytishlari aniq. 

Kamoliddin ALIMOV suhbatlashdi