Davron Fayziev: “Kuz keldimi demak “jo'jalar”ni sanaydigan vaqt keldi”

“Bugungi o'yin haqida gapiradigan bo'lsam, barcha guvohi bo'ldi juda qiziqarli o'yin bo'ldi”, - deb gap boshladi Davron Fayziev. 

“Ko'pchilik menga bitta savolni juda ko'p berdi: Qachon “So'g'diyona” safarda ochko jamg'aradi? Mana bugun biz safarda bir ochko qo'lga kiritdik. Durang adolatli natija bo'ldi. Bugun samarqandlik muxlislar jamoamizni qarsaklar bilan qarshi olgani menga juda yoqdi.

“O'yinda bizda ham, maydon egalarida ham vaziyatlar bo'ldi, o'yin jangovor ruhda o'tdi. Durang natijadan to'la qoniqdim deya olmayman, har bir murabbiy doim nimadandir qoniqmaydi, 8:0 hisobida yutsangiz ham o'yindan qoniqmasligingiz mumkin. Natija qoniqtirishi mumkindir, ammo qaysidir joydagi o'yin yoqmasligi mumkin. Biz Samarqandga durang uchun emas g'alaba uchun kelgandik, ammo durangga erishdik. “Dinamo” o'z muxlislari qarshisida g'alaba qozonishni istashi aniq edi, biz shunga yarasha tayyorgarlik olib borgandik”.

“Har bir raqibga xurmat bilan qaraymiz, hozircha oliy ligani kim tark etishi malum emas. Oliy liganing ikkala qismida ham kurash so'nggi turlarga qadar kechishiga shubha yo'q. Lekin unutmangki kuz keldi, demak “jo'jalar”ni sanaydigan palla keldi. Vaqt kam qolmoqda, 8ta o'yin qoldi, shuni inobatga olsak barcha jamoalarda imkoniyat bir xil”.

Umid Raimjonov yozib oldi