Coca Cola Superligasi. Olmaliqda engilmaganlar to'qnashuvi, "So'g'diyona" Namanganda mehmon, "Paxtakor" "Surxon"ni sinovdan o'tkazadi - 7-tur prevyusi

O'quvchilarimiz etiboriga bo'lajak tur prevyusini taqdim etamiz.

Coca Cola Superliga. 7-tur
1 iyul, chorshanba
19:00 - LOKOMOTIV – QIZILQUM (Oilaviy TV LIVE)
Hakamlar: Ravshan Abduvohidov, Zufar Eliboev, Farhod Usmonov, Komiljon Rasulov
Nazoratchi: Arslon Xotamov
Komissar: Zoxirjon Akramxonov

Restardan keyin g'alaba qozona olmagan klublar o'rtasidagi bahs. Umuman olganda "Qizilqum" 2020 yilgi mavsumda hozircha umuman g'alaba nashidasini surgani yo'q.

Hozirga qadar "Lokomotiv" va "Qizilqum" O'zbekiston chempionatida jami 30 marta to'qnash kelishgan. 17 bor "temiryo'lchilar", 7 bor "oltin izlovchilar" 3 ochkoni qo'lga kiritishgan. Qolgan olti uchrashuvda durang kuzatilgan.

"Lokomotiv" bu jamoaga qarshi kechgan oxirgi 12ta o'yinning (uyda va safarda) hech birida mag'lub bo'lmagan - 10ta g'alaba va 2ta durang. So'nggi bor "Qizilqum" 2013 yilgi mavsumda bu raqibni mag'lub etgan ekan.

Toshkentdagi o'yinlarga etibor qilsak, 15ta o'zaro o'yinda "Qizilqum" ikki marta (2012 va 2005 yillarda) g'olib bo'lgan.

19:00 - ANDIJON – BUNYODKOR (Mahalla TV LIVE)
Hakamlar: SHavkat Nasibullaev, Rasuljon Fozilov, Maksim Nexochin, Doston Mirzaraimov
Nazoratchi: G'ayrat Karimov
Komissar: Erkin Baxtiyorov

“Burgutlar” “qaldirg'ochlar”ga qarshi. Ushbu jamoalar shu kungacha 20 marotaba bahs olib borishgan. O'tkazilgan 20 ta uchrashuvning 15 tasida “Bunyodkor” jamoasini qo'li baland kelgan bo'lsa, “Andijon” bir marotaba ham g'alaba qozona olmagan. 5 ta uchrashuvda esa durang natijasi qayd etilgan.

Andijonda o'tgan oxirgi ikki uchrashuvda ham durang qayd etilgan. "Bunyodkor" so'nggi bor 2015 yilgi mavsumda "burgutlar" maydonidan g'alaba bilan qaytgan ekan.

Bu mavsum "Andijon" o'z uyidagi ikkala o'yinda ham gol ura olmadi va g'alaba qozona olmadi. "Bunyodkor" esa safardagi so'nggi ikki uchrashuvda gol ura olmadi va ikki bor mag'lub bo'ldi.

19:00 - QO'QON-1912 – MASH'AL (SPORT TV LIVE)
Hakamlar: Viktor Serazitdinov, Abduhamidullo Rasulov, Avazbek Abdullaev, Abdurashid Xudoyberganov
Nazoratchi: Igor Nexochin
Komissar: Aleksandr Davidenko

O'z maydonida faqat g'alaba qozonayotgan "Qo'qon-1912" bu turda safarda umuman g'alaba qozona olmagan "Mashal"ni qabul qiladi.

Bu ikki klub O'zbekiston chempionatida bugunga qadar 12 bor o'zaro o'yin o'tkazishgan. 7 bor "Mashal"ning qo'li baland kelgan, 2 bor qo'qonliklar zafar quchishgan va 3 bor durang qayd etilgan.

"Qo'qon-1912" bu jamoani 4ta o'yindan buyon (uyda va safarda) mag'lub eta olmay kelmoqda. So'nggi bor vodiy klubi 2015 yilda "Mashal"dan ustun kelgan edi.

2 iyul, payshanba
19:00 - BUXORO – METALLURG (Mahalla TV LIVE)
Hakamlar: SHerzod Qosimov, Alisher Usmonov, Sanjar SHoyusupov, Rustam CHoriev
Nazoratchi: Andrey Klepikov
Komissar: Muhammad Sodiq Sodiq-Oxunov.

"Buxoro" va "Metallurg" hozirga qadar 44 bor o'zaro o'yin o'tkazishgan. 20ta uchrashuvda bekobodliklar, 18ta bahsda buxoroliklar g'olib chiqishgan. Yana 6ta uchrashuv durang natijasi bilan tugagan.

"Metallurg" bu jamoa maydonida faqat ikki marta (2008 va 2015 yillarda) g'olib bo'lgan. "Buxoro" o'z maydonidagi so'nggi 5ta uchrashuvda "Metallurg"ga umuman yutqazmagan.

20:00 - PAXTAKOR – SURXON (SPORT TV LIVE)
Hakamlar: Elyor Tursunov, Husniddin SHodmonov, Aleksandr Burov, Ilya Ilin
Nazoratchi: Marat Ismoilov
Komissar: Ramil Ilyasov

Jamoalar chempionatlar doirasida hozirga qadar 26 bellashuvda maydonga tushishgan. O'zaro o'yinlarda "SHerlar" katta ustunlikka ega. 20 o'yinda g'alaba qozongan "Paxtakor" bir bor durang qayd etib, 5 uchrashuvda imkoniyatni boy bergan.

So'nggi bor "Surxon" "Paxtakor"ni bundan 17 yil muqaddam 2003 yilgi mavsumda mag'lub etgan edi.

Toshkentdagi 13 to'qnashuvning 12tasida "Paxtakor" va faqat bittasida "Surxon" g'alaba qozongan (1994 yil). Demak termizliklar 26 yildan buyon Toshkentda "Paxtakor"ni mag'lub eta olmay kelishmoqda.

Bu mavsum "Paxtakor" o'z maydonidagi 4ta o'yinning barchasida g'olib bo'ldi. "Surxon" esa safarda o'tkazgan oxirgi ikki uchrashuvda raqiblari darvozasiga gol ura olmadi va ikki bor imkoniyatni boy berdi.

20:00 - NAVBAHOR – SO'G'DIYONA (Dunyo bo'ylab TV LIVE)
Hakamlar: Vadim Agishev, Rishat Nugmanov, Hasan Nabiev, Akmaljon Rahimov
Nazoratchi: Baxtiyor Tog'aev
Komissar: Sardor Qudratullaev

Restarni 7 ochko bilan boshlagan ikki klub o'rtasidagi bahs. "Navbahor" va "So'g'diyona" klublari hozirga qadar 48 bor to'qnash kelishgan. "Lochinlar" 24ta uchrashuvda g'alaba qozonishgan. 17 bor jizzaxliklarning qo'li baland kelgan. Qolgan 7ta o'yinda durang kuzatilgan.

"So'g'diyona" o'z tarixida hech qachon Namanganda g'alaba qozona olmagan ekan. Vodiyda o'tgan 24ta uchrashuvning 5tasida durang qayd etilgan va 19ta bahsda "Navbahor" g'olib bo'lgan. "So'g'diyona" Namangandan so'nggi bor 2016 yil ochko olib qaytgan. "Navbahor" bu raqib bilan o'z uyidagi oxirgi 3ta o'yinda 3ta g'alabaga erishgan.

20:00 - AGMK – NASAF (Oilaviy TV LIVE)
Hakamlar: Jasur Muxtorov, Ruslan Serazitdinov, Husniddin Bahodirov, Dostonbek Rahmonov
Nazoratchi: Timur Abdullaev
Komissar: Laziz Qo'chqorov

2020 yilgi Superligada mag'lub bo'lmagan ikki klubning o'zaro to'qnashuvi. AGMK va "Nasaf" O'zbekiston chempionatida bugungacha 26 marta o'zaro o'yin o'tkazishgan. "Ajdarlar" hisobida 13ta g'alaba mavjud, 4 bor olmaliqliklar 3 ochkoni qo'lga kiritishgan. Qolgan 9ta o'yinda tomonlar murosa ko'chasini tanlashgan.

AGMK chempionatda qatorasiga 4 o'yindan buyon g'alaba qozonayotgan bo'lsa, "Nasaf" karantindan keyingi hamma o'yinda durang o'ynamoqda.