Coca Cola Superligasi. Bugun 22-tur start oladi

15:15 - “Qo'qon-1912” – “Qizilqum”
Hakamlar: Temur To'xtasinov, Ziyodulla Abdurahmonov, Anvar Marajabov, Akmal Rahimov
Nazoratchi: Igor Nexochin
Komissar: Oybek Yunusov

Oxirgi 4ta turda umuman g'alaba qozona olmagan "Qizilqum" safarda ikki uchrashuvdan buyon yuta olmayotgan "Qo'qon-1912" mehmoni bo'ladi.

Dastlabki davrada Navoiyda kechgan uchrashuvning so'nggi daqiqalarida Murod Xolmuhammedov tomonidan urilgan gol vodiy klubiga g'alaba taqdim etandi - 1:0.

O'zaro o'yinlar tarixiga murojaat qilsak 17ta uchrashuvning 10tasida Navoiy shahri klubi g'olib bo'lgan, 6ta bahsda "Qo'qon-1912" zafar quchgan va bitta o'yinda duran kuzatilgan.

O'zaro uchrashuvlarning oxirgi ikkitasida "Qo'qon-1912" ikkita g'alabaga erishgan.

17:30 - “Bunyodkor” – AGMK
Hakamlar: Akobir SHukurullaev, Ruslan Serazetdinov, Andrey Capenko, Rahimbek Karimov
Nazoratchi: Sayfiddin Ermatov
Komissar: Diyor Imomxo'jaev

Vadim Abramov va Mirjalol Qosimov to'qnashuvi.

Yaqindagina O'zbekiston kubogi yarim finalida to'qnash kelgan klublar endi Superliga doirasida o'zaro o'yin o'tkazishadi.

Birinchi davrada Olmaliqda o'tgan bahsda Lutfulla To'raev tomonidan urilgan gol "Bunyodkor"ga g'alaba keltirgandi - 1:0.

Bu ikki klub O'zbekiston chempionatida hozirgacha o'zaro 23ta o'yin o'tkazishgan. 16ta bahsda "qaldirg'ochlar" g'olib bo'lishgan. Ikki uchrashuvda Olmaliq jamoasi muvaffaqiyatga erishgan bo'lsa yana besh uchrashuvda g'olib aniqlanmagan.

"Bunyodkor" O'zbekiston chempionatida bu jamoaga 12ta uchrashuvdan buyon, xoh uyda, xoh safarda bo'lsin, yutqazmay kelmoqda.

AGMK bu raqib maydonida hech qachon g'alaba qozona olmagan - 2 durang va 9 mag'lubiyat.

17:30 - “Metallurg” – “So'g'diyona”
Hakamlar: Viktor Serazetdinov, Olim Abduvosilov, Timur Gaynullin, Abdurashid Xudoyberganov
Nazoratchi: Baxtiyor Tog'aev
Komissar: Sardor Qudratullaev

Uchta o'yindan buyon g'alaba qozona olmayotgan va raqib darvozasiga gol ura olmayotgan "So'g'diyona" Bekobodda "Metallurg" mehmoni bo'ladi.

Birinchi davrada Jizzaxda o'tgan o'zaro o'yinda maydon egalari 2:1 hisobida g'alaba qozonishgan edi.

Bu jamoalar o'rtasidagi 35ta o'yinning 14tasida "Metallurg" g'olib chiqqan. Qizig'i "So'g'diyona"ning g'alabalari soni ham aynan 14ta. Qolgan 7ta bahsda durang kuzatilgan.

"Metallurg" oxirgi uch yilda Bekobodda bu raqibni uch marta mag'lub etgan. So'nggi marta "So'g'diyona" ushbu jamoa maydonidan 2015 yilda 3 ochko bilan qaytgan.