Coca Cola Superligasi. 18-tur laureatlari

Saytimiz o'z annasiga sodiq qolgan holda tur laureatlarini aniqladi. 

"So'g'diyona" darvozaboni Milan Mitrovich yakunlangan turda "Lokomotiv" bilan bahsda ajoyib o'ynadi. "Temiryo'lchilar"ning ko'plab hujumlari va zarbalaridan keyin Mitrovich jamoasini gollardan qutqarib qoldi va haqli ravishda championat.asia talqiniga ko'ra 18-turning eng yaxshi darvozaboni deb topildi.

"So'g'diyona" himoyachisi SHahboz Jo'rabekov "Lokomotiv" bilan bahsda ajoyib gol urishga muvaffaq bo'ldi. Belgilangan jarima to'pini Jo'rabekov chiroyli tarzda raqib darvozasiga yo'lladi. SHu tariqa SHahboz Jo'rabekovning goli Championat.asia talqiniga ko'ra turning eng chiroyli goli deb topildi.

Bu turda Qarshida Qashqadaryo derbisi bo'lib o'tdi. Unda "Nasaf" "Mashal"ni qabul qildi. SHu kuni "ajdarlar" hujumchisi Bobir Abdixoliqov juda ham faol o'ynadi. Ikkinchi taymda hujumchi ikkita gol urishga erishdi va Abdixoliqovning bu mavsumdagi gollari soni 14taga etdi. SHu bois Championat.asia talqiniga ko'ra Bobir Abdixoliqov 18-turning eng yaxshi futbolchisi deb topildi.

Bu tur Navoiyda "Qizilqum" "Qo'qon-1912"ni qabul qilib 2:1 hisobida g'alabaga erishdi. Bir nechta turdan buyon g'alaba qozona olmayotgan "Qizilqum" bu safar o'z maydonida irodali g'alabani qo'lga kiritdi. Championat.asia talqiniga ko'ra Hamidjon Aktamov 18-turning eng yaxshi murabbiyi deb topildi.