CHo'pon yigit va qirol to'qnashuvi

Argentinalik afsona jahon futboli tojini batamom o'ziniki qilib olishi uchun ushbu mundialda g'olib bo'lishi kerak va u bunga ancha yaqin. Ikki o'yindagi g'alaba Leoga barcha davrlarning eng zo'r futbolchisi maqomini taqdim qiladi.

Modrich va Messi to'qnashuvi

JCH yarim finalida Messi boshchiligidagi argentinaliklar final chiptasi uchun Modrich "armiyasi"ga qarshi jang qiladi. Messi 13 yoshida "Barselona" azosiga aylanganini bilasiz. Lukaning bolaligi esa butunlay boshqa ruhda o'tgan. Xorvatlar etakchisi bobosining qo'lida katta bo'lgani, Zadar tog' etaklarida qo'y-echki boqish bilan shug'ullangani haqida malumotlar bor. Xorvat urush sabab qiyin bolalik davrini o'tkazganligi, bobosi uyi ostonasida otib o'ldirilganligi haqida eshitgansiz. Modrich biografiyasini chuqur o'rgangan inson sifatida shuni aytishim mumkinki, bugun janubiy amerikaliklarga oson bo'lmaydi. To'g'ri, Xorvatiya birgina Modrichdan iborat emas, ammo Modrichi bor Xorvatiya o'ta xavfli. “Evropa bo'rilari”ni raqib kuchli pressing qilayotgan paytda aynan Modrich intellekti vaziyatdan olib chiqadi. Luka 2018 yilgi “Xorvatiya mo'jizasi"ning asosiy ijodkorlaridan biri. Yodingizda bo'lsa, Rossiyadagi mundialda Xorvatiya doim ikkinchi raqamli jamoa bo'lib harakat qilgan va yakunda natijaga erishgan. 

Raqamlar aldamaydi

2018 yilgi mundialda ikkala jamoa bir guruhdan o'rin olgan va o'zaro o'yinda Xorvatiya 3-0 hisobida g'alaba qozongan. Statistikaga qaraydigan bo'lsak, tomonlar bugungacha 5 bor to'qnash kelishgan. Ko'rsatkichlarda tenglik: tomonlarda 2 tadan g'alaba va 1 durang bor. 2006 yilning 1 martida bo'lib o'tgan o'rtoqlik uchrashuvi xususida to'xtalsak. Evropaliklarning 3-2 hisobidagi g'alabasi bilan yakunlangan bahsda Modrich terma safidagi debyut o'yinini o'tkazgan, Leo esa milliy jamoa safidagi ilk golini urgan. Bugungi qarama-qarshilikda ko'p narsa Leo hamda Luka ko'rsatadigan o'yinga bog'liq. Hozirgi Argentina Messiga qay darajada suyanib qolgan bo'lsa, Xorvatiyada ham shunga yaqin vaziyat. Xabarlarda yozilishicha, “Oltin to'p” uchun davogarlar ro'yxatida Messi etakchilik qilayotgan ekan, Modrichning kuchli 10 likda yo'qligi meni ajablantirdi. Nima ham derdik! Ehtimol, JCHdan so'ng barchasi o'zgarar. 

Ehtimoliy o'yin “kartina”si

Xorvatiyaning Braziliya bilan o'yiniga qaraydigan bo'lsak, bugungi bahsda katta ehtimol teng o'yin ko'ramiz. Argentinaliklar ham Niderlandiyaga qarshi o'yinda "viking"lardek harakat qilishdi. Ikki tomon ham kurashni "ushlab olgan" – buyog'i haqiqiy jang. Xorvatlar himoyasi Yoshko Gvardiol etakchiligida ajoyib qo'rg'on hosil qilgan, Argentina mudofaa chizig'i ham ancha o'ziga kelib oldi. Yarim himoya chizig'idagi to'qnashuvda ustunlik evropaliklar tarafida. Modrich, Brozovich, Kovachich uchligi markazda gegemon bo'lsa, hujum chizig'ida aksincha, janubiy amerikaliklar o'ta kuchli. Katta ehtimol bilan ikki xil taymga guvoh bo'lamiz. Jamoalar ilk 45 daqiqalikni ehtiyotkorona tarzda o'tkazsalar kerak. Ikkinchi taym esa nisbatan vaziyatlarga boy bo'lishini kutyapman. 

Kiperlar to'qnashuvi

Ikkala jamoa ham ajoyib darvozabonlarga ega. Xorvatiya nimchorak finalda Yaponiya, chorak finalda Braziliya ustidan penaltilar seriyasida g'alaba qozondi. Dominik Livakovichning super harakatlari yodingizda bo'lsa kerak. Emiliano Martines esa Argentinani "uchar gollandlar" to'sig'idan olib o'tdi. Bahs penaltilar seriyasiga etib borsa, bizda Livakovich – Martines to'qnashuvini ko'rish imkoniyati paydo bo'ladi. 

Yangi darajaga chiqqan Leo

Messining talantiga gap-so'z bo'lishi mumkin emas, ammo Leo ushbu mundialgacha termasi yutqazayotgan paytlarda qutqaruvchi rolini bajara olmayotgandi. Oldingilaridan farqli, Messi bu safar jamoani bir o'zi tortyapti va muhim pallalarda barchasini o'zi hal qilyapti. Voqealar rivoji Messini jahon chempionligi tomon etaklamoqda. Ko'ramiz va kuzatamiz, ushbu mundial siz-u bizga futbolda hamma narsa bo'lishi mumkinligini yana bir bor eslatib qo'ydi. Terma jamoalarga va ularning muxlislariga omad tilaymiz, yakunda kuchli tomon g'alaba qilsin. Siz-chi, qadrdon o'quvchi, qaysi tomonning imkoniyatlarini yuqori baholaysiz? 

Jaloliddin Xalilov