CHempionlar Namanganga kelishadi

Yubiley tantanalarini muxlislar munosib jamoaga ega bylgan holda kutib olishni istashayotganligi bor gap. Aynan shu munosabat bilan klubimiz rahbariyati muxlislarni xursand qilish maqsadida chempionlikni qo'lga kiritilishida xizmat qilgan jamoa azolarini Namanganga taklif qilishni maqsad qilishgandi. Aslini olganda chempionlarni Namanganga to'plash g'oyasi o'tgan mavsumda paydo bo'lgandi. Avvaliga chempionat yakunida shou tashkil qilish rejalashtirilgan bo'lsada, ayrim futbolchilarni belgilangan muddatda yurtimizga kela olmasliklari tufayli bu reja amalga oshmay qolgandi.

1996 yili chempion bo'lgan jamoa safida to'p surgan aksariyat futbolchilar ayni paytda asosan Rossiya davlatida istiqomat qilib o'sha erda mehnat qilishmoqda. Dmitriy Bashkevich, Dmitriy Batinkov, Marat Dilmuxamedov, Eduard Momotov Anvar Asadullaev kabi futbolchilar bilan bog'lanib, ularga shou o'tkazilayotganligi haqida xabar berdik. Yuqorida nomlari qayd etilgan sobiq futbolchilarimiz hozirda turli sohalarda faoliyat olib borishayotgan bo'lsada, fevral oyi so'nggida Namanganga tashrif buyurishga rozi ekanliklarini malum qilishdi.

27 fevral sanasida o'tishi rejalashtirilayotgan shou uchrashuv “Navbahor” markaziy o'yingohida bo'lib o'tadi. Tadbirda “Navbahor” jamoasining ayni paytdagi tarkibi 1996 yili chempionlikni qo'lga kiritgan jamoa azolariga qarshi shou uchrashuvida maydonga tushishadi. Tadbirga sanatkorlar ishtirokidagi koncert dasturini ham kiritilganligini qo'shimcha qilish joiz. 1996 yilgi O'zbekiston chempionlarini yana bir bor Navbahor o'yingohida ko'rish jamoaning ashaddiy ishqibozlari uchun chin manoda bayram vazifasini o'tab beradi.