"Championat.asia" Turkiyada, ertaga O'zbekiston MTJ ham etib keladi

O'yin Turkiyaning Alanya shahridagi "Alanya stedium"da bo'lib o'tadi.

"Championat.asia" sayti xodimlari Tolibjon Qosimov hamda Jahongir Fayzullaevlar bosh jamoamiz ishtirokidagi bellashuvni voqea joyidan yoritib borish maqsadida kecha Alanyaga etib keldik. Toshkentdan ertalabki soat sakkizga yaqin yo'lga chiqdik, to'g'ridan-to'g'ri reys yo'qligi sabab Istanbul aeroportiga, keyin esa ikki soat kutishdan so'ng Antalyaga uchdik. Antalya aeroportida esa bizni oldindan kelishib qo'yilgan sayyohlik firmasi xodimi kutib turardi. U bizni mehmonxonaga eltib qo'yadigan maxsus ulovga chiqarib yubordi. Yo'l-yo'lakay bizni olib ketayotgan haydovchi bilan suhbatlashib ketishga harakat qildik (garchi turk tilini yaxshi bilmasak-da bir-birimizni tushuna oldik, har holda). U Turkiya terma jamoasi O'zbekiston bilan o'rtoqlik o'yini o'tkazishi haqida bilishini, ammo bahs qaysi kuni o'tishidan bexabar ekanligini aytdi. Bizdan o'yin kunini bilganidan keyin ishi yuzasidan xizmat chiqib qolmasa albatta borishini takidladi.

Mehmonxonaga borganimizdan keyin qabulxonadagi turk yigitlardan ham o'yin haqida so'radim. Ochig'i, kim bilan suhbatlashgan bo'lsak ularning hammasidan o'rtoqlik o'yini bo'lishidan xabari bor yoki yo'qligini so'radim. CHunki, shaharchadagi odamlarning futbolga qiziqishi qay darajada ekanligini bilish o'zim uchun juda qiziq. Qabulxonadagi yigitlar uchrashuv haqida bilishar ekan, bizni jurnalist va fotomuxbir ekanligimizni bilishgach futbol borasida gapni boshlab yuborishdi. Turk tilini yaxshi bilmaymiz deb shuncha gaplashdingizmi deb hayron bo'layotgandirsiz. Qabulxonadagi yigitlarning har ikkisi ham rus tilini bilarkan. Sababi, bu erga rus sayyohlar juda ko'p tashrif buyurishadi. Bunga mehmonxonadagi kechqurungi shouda ham amin bo'ldik. Xullas, yigitlar bilan futbol mavzusidagi suhbatimiz turk muxlislari haqidagi iliq so'zlar bilan yakun topdi. Afsuski, bu erda Evropa ligasi finalini televizor orqali ko'rishning iloji bo'lmadi. Xonada ham, lobbida ham birorta futbol kanali ko'rsatmas ekan. Noiloj, bellashuvni biroz qotgan holda bo'lsa ham internet orqali tomosha qilishga majbur bo'ldik.

Biz joylashgan mehmonxonadan "Alanya stedium"gacha 30 kmdan biroz ko'proq masofa bor. Bizda tom manodagi ish ertadan boshlanadi. Ertaga terma jamoamiz Antalyaga uchib keladi va u erdan Alanya shahriga. Biz esa Ektor Kuper boshchiligidagi terma jamoamizni aeroportdan yoki mehmonxonada kutib olishga harakat qilamiz. Demak, ertadan boshlab terma jamoamizning Turkiyadagi mashg'ulotlari va o'rtoqlik o'yinini saytimiz o'quvchilari uchun imkon qadar yoritib borishga harakat qilamiz.

Tolibjon Qosimov, Jahongir Fayzullaev

Alanya, Turkiya