Championat.asia hamda Transfermarkt O'zbekiston Superligasining may oyidagi eng yaxshi murabbiyi va futbolchisini aniqladi

Superliganing may oyidagi eng yaxshi murabbiyi Vadim Abramov bo'ldi. Uning qo'l ostida Samarqandning “Dinamo”si to'rtta o'yindan uchtasida g'alaba qozongan bo'lsa, bir marta durang o'ynadi. "Dinamo" ayni damda O'zbekiston chempionatida 22 ochko bilan uchinchi o'rinni egallab turibdi. Ayni vaqtda samarqandliklar zaxirasida bitta o'yin bor va g'alaba qozongan taqdirda chempionatda peshqadamlik qilayotgan "Nasaf" bilan ochkolarini tenglashtirib olishi mumkin. Respondentlarning 45 %i Abramovga ovoz bergan bo'lsa, ikkinchi o'rin "Paxtakor" bosh murabbiyi vazifasini bajaruvchi Kamoliddin Tojievga nasib etdi (40 %).

Igor Sergeev may oyida Superliganing eng yaxshi futbolchisiga aylandi. "Paxtakor" forvardi allaqachon aprel oyi natijalariga ko'ra eng yaxshi deb topilgandi. Shu tariqa Sergeev ketma-ket ikkinchi oy bu so'rovnomada g'alaba qozondi. 32 yoshli hujumchi may oyida 4 o'yin o'tkazib, 4 ta gol urdi, shuningdek, O'zbekiston Superligasining eng yaxshi to'purarlari ro'yxatini ham boshqarib turibdi (11 o'yinda 9 ta gol). Sergeev 40% ovoz to'plagan bo'lsa, ikkinchi o'rinni OKMK vingeri Xurshid G'iyosov (25%) egalladi.