"Chacha Navruz Cup"-2018. Birinchi yirik musobaqa o'z yakuniga etdi

Xabar berib o'tganimizdek, 68ta jamoa ishtirok etgan mazkur musobaqa yosh futbolchilar uchun haqiqiy bayram havosini ulashdi. Bunda bo'lajak yulduzlar bo'lib o'tgan o'yinlarda zavq olish bilan birga katta tajriba to'plashdi.

Aytish joizki, bunday yirik festival Toshkent shahar futbol federaciyasi tomonidan ilk marta tashkil qilindi. Musobaqada poytaxt jamoalaridan tashqari, qo'shni Qozog'iston Respublikasidan vakil, shuningdek o'zimizning vodiydan, Samarqand, Qarshi, Navoiy va Jizzaxdan ham jamoalar ishtirok etishdi.

2006 yilda tug'ilgan futbolchilar musobaqa shaklida o'yinlarni o'tkazgan bo'lsa, 2007, 2008, 2009 va 2010 yillarda tug'ilgan futbolchilar uchun "Chacha Navruz Cup"-2018 festival tartibida o'tkazildi. 2006 yilgi futbolchilar o'rtasidagi yarim final va final bahslari juda qizg'in kechdi. Yarim finalda "Bunyodkor" "Navbahor"ni mag'lub etgan bo'lsa, "Paxtakor" (Toshkent) Surxondaryoning "Paxtakor" jamoasidan ustun keldi.

"Bunyodkor" stadioni hududidagi maydonda yarim finallardan so'ng dastlab 3-o'rin uchun bahs o'tkazildi. Bunda "Navbahor" futbolchilari Surxondaryo jamoasini 2:1 hisobida mag'lub etishdi. Hal qiluvchi final o'yinida esa Toshkentning ikki klubi - "Paxtakor" va "Bunyodkor" tarbiyalanuvchilari o'zaro bahs olib borishdi. Murosasiz kurashlar ostida kechgan uchrashuvda "Bunyodkor" 3:2 hisobida raqibidan ustun keldi. SHu tariqa "Bunyodkor" tarbiyalanuvchilari "Chacha Navruz Cup"-2018 musobaqasi g'olibligini qo'lga kiritishdi.

O'yinlar yakuniga etgach, dastlab 2007 va 2008 yillarda tug'ilgan futbolchilarni taqdirlash marosimi tashkil etildi. Aytish mumkinki, bunda barcha jamoalarga medallar va kubok topshirildi. Musobaqa g'olibini taqdirlash marosimi esa nihoyatda qiziqarli kechdi. Dastlab festivalni o'tkazishda yaqindan yordam bergan insonlarga maxsus diplomlar hamda musobaqa homiylari va hamkorlari "Chacha" va "Tudor" savdo belgisi vakillari tomonidan estalik sovg'alar topshirildi.

G'olib jamoa "Bunyodkor" akademiyasi tarbiyalanuvchilarini taqdirlash esa tadbirning eng kulminacion voqeasi bo'ldi. Toshkent shahar futbol federaciyasi vice-prezidenti Nodirxo'ja Yuldashev g'olib jamoaga bosh sovrin kubokni topshirayotgan mahal maydon bo'ylab mashhur Queen guruhining eng mashhur qo'shig'i We are the Champions yangrab turar, bu esa nafaqat bolakaylarning, balki atrofdagilarning ham qalbini o'ynatib yubordi.

Jamoa sardori kubokni boshi uzra ko'tarishi hamonoq ikki yondan zarlar salyuti boshlandi. Xuddi CHempionlar ligasi finalida bo'lgani kabi. Ochig'i, musobaqaning bunday yakunini hech kim kutmagandi. Yosh "qaldirg'ochlar" chempionlikni maza qilib nishonlashdi. Ular maydon bo'ylab kubokni ko'targan holda yugurar, atrofda yig'ilgan tomoshabinlar hamda ota-onalar chempionlarni tinmay suratga tushirishardi.

Aytib o'tganimizdek, bunday yirik turnir birinchi bor tashkil etildi. Bu musobaqadan eng avvalo bolajonlar olam-olam zavq olishdi. SHu o'rinda turnir yuqori saviyada o'tishini taminlashda o'zining hissasini qo'shgan barcha-barchaga minnatdorchilik bildirib qolamiz. O'ylaymizki, bunday musobaqalar hali ko'p bo'ladi va bu kabi turnirlar yurtimizda bolalar futboli rivoj uchun xizmat qiladi.      

2006 y. 1/2 final. 27 mart
"Bunyodkor" - "Navbahor" 2:0
"Paxtakor" (Toshkent) - "Paxtakor" (Surxondaryo) 3:0

3-o'rin uchun. "Navbahor" - "Paxtakor" (Surxondaryo) 2:1
FINAL. "Bunyodkor" "Paxtakor" (Toshkent) 3:2

2007 y. 4-o'yin kuni. 27 mart
“Oldja Sports” – «Navbahor» 0:6
IBO'SM  – Bekobod 0:0
«Bunyodkor» – Buxoro 3:0
«Odil Junior-T» – «Paxtakor» 4:0
«Odil Junior-N» – Samarqand 0:4
«Qo'qon-1912» – BO'SM 1:0
"Kosonsoy" - «Farovon» 2:0
«Barkamol avlod» - "Uchko'prik" 0:3

2008 y. 4-o'yin kuni. 27 mart
«Paxtakor» – «Navbahor» 4:0
«Odil Junior» - «G'allaorol» 5:0
SSHI – Uchko'prik 1:2
«Bunyodkor» – «Do'stlik» (Marg'ilon) 3:0
BO'SM (CHust) – Sergeli 2:0
«Spartak» 1 – Buxoro 3:1
«Spartak» 2 – «Qo'qon-1912» 4:1
IBO'SM – Andijon FK 3:0