"CA" vakillari Brisbenga etib keldi

Sidney vaqti bilan soat 14:45da samolyotga chiqdik va Brisben vaqti bilan soat 15:15da manzilga etib keldik. Atiga 30 daqiqa uchildimi dersiz. Yo'q, aslida bir soatdan salgina ko'proq parvoz qildik. Sidney va Brisben orasidagi vaqt farqi 1 soatni tashkil etishi tufayli shunday holat yuzaga keldi.

Saytimiz xodimlaridan tashqari Abdurahmon Fozilov boshchiligidagi 70dan ortiq muxlislar ham Brisbenga kelishdi. Xitoyga qarshi bahsda ular qatoriga shu erda istiqomat qilayotgan yurtdoshlarimiz ham qo'shilishi haqida xabar berdik.

Brisben shahrida maydalab yomg'ir yog'moqda, havo Sidneydagiga qaraganda biroz sovuqroq, 25 daraja.

Bugun O'zbekiston terma jamoasi mahalliy vaqt bilan soat 19:00da (Toshkentda 14:00) "Perri Park" stadionida mashg'ulot o'tkazadi. Ushbu mashg'ulotlarni saytimiz vakillari kuzatib borishadi. Terma jamoa lageridagi eng so'nggi yangiliklarni aynan bizning saytimizdan topishingiz mumkin.

Ertaga o'yinoldi matbuot anjumani va rasmiy mashg'ulotlar. 14 yanvarda esa Xitoyga qarshi bahs.

Narzulla Saydullaev
Brisben shahridan