"Buxoro": Qator futbolchilar bilan shartnoma imzolanmoqda

Jamoa kuniga uch mahaldan mashg'ulotlar olib borish bilan birga, juda ko'plab nazorat-sinov uchrashuvlarida qatnashib kelyapti.

Jamoa ixtiyorida juda ko'plab yangi futbolchilar kelib ketishmoqda. Har bir nazorat uchrashuvidan so'ng murabbiylarda iliq taasurot qoldira olmagan futbolchilarga javob berilmoqda. Deyarli kun oralab asosiy tarkib hamda yoshlar turli jamoalar bilan nazorat uchrashuvini o'tkazishyapti.

Bugungi kunga kelib klub ko'plab futbolchilar bilan shartnomalarni izolab bo'ldi. Jumladan o'tgan mavsum “Buxoro” sharafini himoya qilganlar, Aleksandr Korneychuk, Farrux Turdaliev, Suxrob Nematov, Otabek Isroilov va qolgan barcha mahalliy futbolchilar bilan shartnomalar imzolandi.

Yangi kelgan futbolchilardan, Timur Kagirov va Dilyaver Abibulaevlar kelasi mavsumda “Buxoro” sharafini himoya qilishlari aniq bo'lib ulgurdi. Legionerlardan Vitaliy Plamadela bilan ham shartnoma qilindi.

Jamoa mashg'ulotlarida yangi legioner paydo bo'lganini etirof etib o'tishimiz mumkin. Moldavalik himoyachi Dmitriy Bogdan “Buxoro” ko'rigida bo'lib turibdi. 26 yoshli futbolchi Moldaviyaning turli yoshdagi terma jamoalar safida harakat qilgan.

Buxorolik muxlislarga yaxshi tanish bo'lgan legioner,  ukrainalik himoyachi Aleksandr Tarasenko bir muddat jamoa ixtiyorida bo'ldi va nazorat uchrashuvlarda qatnashdi, biroq uning hatti-harakatlari murabbiylar shtabiga maqul bo'lmagan va unga javob berildi.

Mochinov o'z intervyusida takidlaganidek, legionerlar tanloviga juda katta masuliyat bilan yondashyapti. Juda ko'plab legionerlar nazorat ostiga olingan va ularning har biri alohida o'rganib chiqilmoqda. Yaqin kunlar ichida jamoa ixtiyoriga yana bir legioner etib kelishi kutilmoqda. Uning kimligi sir saqlanmoqda, ushbu legioner hujumchi ekanligini aytib o'tish mumkin.

Jamoaning keyingi sparring-raqibi “Andijon” klubi bo'ladi.