"Buxoro" hali beri o'z maydonida harakat qilmaydimi? Liga Buxoro futbol akademiyasi maydoni yuzasidan xavotirda

Avvalroq “Buxoro”ning uy uchrashuvlari uchun Buxoro futbol akademiyasi maydonini tayyor holatga keltirish rejalashtirilgandi. Biroq maydonning yoritish tizimi hozirga qadar Liga talab qilgan ko'rinishga keltirilgani yo'q. Shundan kelib chiqib, klub faqatgina O'zbekiston kubogi doirasidagi uy uchrashuvlarinigina mana shu maydonda qabul qila olmoqda. 

Endilikda futbol maydoni holati yuzasidan ham xavotirlar mavjud. 2022-yilgi O'zbekiston kubogining final uchrashuvi Buxoro shahrida o'tkazilgan bo'lib, uning arafasida Liga rahbariyati viloyat futboli uchun masul shaxslar bilan uchrashuv o'tkazgan hamda maydon masalasida fikr almashgandi. Qo'shimchasiga, stadion va maydonni rasmiy uchrashuvlarga qay tartibda tayyorlash kerakligi to'liq ko'rsatib berilgan, parvarish uchun mahalliy mutaxassislarni o'qitish mavzusi ham kun tartibidan joy olgan.  

Shunga qaramay, o'tgan davr davomida Buxorodagi futbol maydonlarini parvarish qilish uchun na mahalliy mutaxassis tayyorlandi va na boshqa mutaxassislar bilan ishlash amaliyoti yo'lga qo'yildi. Shuningdek, stadion parvarishi uchun Liga talab qilgan birorta texnika sotib olinmadi. Ayni vaqtda maydon maysasi uchun zarur bo'lgan ozuqa ham mavjud emasligi, maydon parvarishi etarli darajada amalga oshirilmayotganidan kelib chiqib, futbol akademiyasi maydonining holati ham kundan-kunga yomonlashib bormoqda. 

Jazirama kunlar yaqinlashib kelayotgani, bu vaqtda maydon holatini ushlab turish yanada murakkab ko'rinish olishidan kelib chiqib, Liga futbol maydoniga etiborni professional darajaga olib chiqishni tavsiya qiladi.