Intervyu. Butsalarini mixga ilgan Murod Xolmuhammedov: "Qo'qon-1912"dan boshqa jamoada o'ynashni istamadim"

Gap Murod Xolmuhammedov haqida ketmoqda. Biz futbolchi bilan bog'landik va malumot olishga muvaffaq bo'ldik. Malumot uchun, suhbatdoshimiz yashil maydonda "Paxtakor", "So'g'diyona", "Qo'qon-1912", "Bunyodkor", "Dalian SHide" klublarining liboslarida to'p tepdi. 2008 yil O'zbekiston yoshlar terma jamoasi bilan Saudiya Arabistonidagi Osiyo chempionatida finalgacha etib bordi, keyingi yil Misrdagi U-20 Jahon chempionatida qatnashdi. Milliy terma jamoada 10dan oshiq uchrashuvda harakat qildi. 

Superliga-2023. Nesterov va Xolmuhammedov hech qaysi klubda yo'q

-  Umuman ko'pchilikni qiziqtirayotgan savol, Murod Xolmuhammedov bu yil hech qaysi klubdan ro'yxatdan o'tmadi. Butsalaringizni mixga ildingizmi?

- To'g'ri, hech qaysi jamoada ko'rinish berganim yo'q. Sababi oddiy, futboldagi faoliyatimni yakunlashga qaror qildim. 

- Futbolda qoldingizmi? Bugungi kunda nima bilan mashg'ulsiz?

- Yo'q, hozir shu bugungi kunda futbolda emasman. SHaxsiy bizneslarim bilan shug'ullanmoqdaman. 

- Qishda bir nechta klublar takliflarini rad etdingiz. Hattoki, "Qo'qon-1912" o'zida olib qolishga, murabbiylar shtabida ko'rishga ham rozi bo'lgan ekan. Bunday qarorni qabul qilishingiz haqida nima deya olasiz?

- To'g'ri, o'zim istagan klublardan yaxshi takliflar kelib tushdi. Ularga rad javobini berishimga sabab faoliyatimni to'xtatganim bo'ldi. Yana bir omil borki, "Qo'qon-1912"dan boshqa jamoada o'ynashni istaganim yo'q. Bu klubga hurmatim baland. Ulardan ham chorlov bo'ldi, futbolchi sifatida jamoani yana Superligaga qaytarish va yaxshi jamoa shakllantirish yoki jamoada murabbiylar shtabida ish boshlab vazifani birgalikda bajarish taklifi bilan chiqishdi. 

- Baribir futbolchilikni tugatish bosqichiga kelayotganda rejalar bo'ladi, murabbiy bo'lib davom ettirish yoki biron futbol sohada ishlash. Kelajagingiz haqida avvaldan rejangiz bormidi?

- Hali beri futbolchilik faoliyatimni tugatish niyatim yo'q edi. Afsuski, shunday qaror qabul qilishga majbur bo'ldim. Buning 2-3ta sabablari bor edi, deya olaman. Yuqorida aytganimdek birinchisi Qo'qondan o'zga klubda o'ynamaslik bo'lsa, ikkinchisi faoliyatimni barqaror davom ettirishim uchun jarrohlik amaliyotini o'tkazishim kerakligi. Ammo o'zimda futboldan so'ng murabbiy bo'lib ishlash rejasi bo'lmagan. Qolaversa, murabbiylikka qiziqishim yo'q. Rejam o'zimning tadbirkorlik faoliyatimni davom ettirish. SHu bilan birga yaqin yillarda Qo'qon jamoasi shtabi bilan birgalikda bo'lish rejasi ham yo'q emasdi. 

- "Qo'qon-1912"ning Superligadan tushib ketishi, bu Qo'qonga katta signalmi? Umuman chempionatimizning bugungi saviyasi oshdi desak nimaning hisobiga oshdi, tushgan desak bu nimaning evaziga?

- Men bu holatni tasodif va omadsizlik bilan o'lchagan bo'lardim. "Qo'qon-1912" Superligadan tushib ketishga loyiq emasdi. Biroq bandasining emas, xudoning aytgani bo'lar ekan. Biz borimizni berib oxirigacha kurashdik. Afsus uddalay olmadik. CHempionatimizni kuchaydi yoki kuchsizlandi, deya olmayman. Sababi baribir sekin-asta oldinga intilish bo'lmoqda. Natijasi ham yaxshi tomonga o'zgarishi kerak. 

- Jarima zarbalari, penaltilar ijrochisi sifatida tanilgansiz. Superligada o'zingizga o'xshagan futbolchini ko'ryapsizmi? 

- O'zimni unday, deb o'ylamagan bo'lardim. Superligada standartlar bo'yicha kuchli futbolchilar ko'p. 

- Murod Xolmuhammedov kecha va bugun, yillar o'tishi natijasida o'zingizda nima o'zgardi?

- Nimanidir aniq ko'rsata olmayman. Yoshingiz ulg'ayib borgani sari har bir inson o'zgarib boraverar ekan. 

- Futbolda o'zingizni cho'qqingiz sifatida qaysi davringizni ko'rsatgan bo'lardingiz?

- Albatta o'ylab o'tirmasdan Qo'qonda o'tkazgan faoliyatimni aytaman. 

- Sizni yanada oldingi siljishingizga, deylik o'sha pallada Osiyo chempionatidan keyin o'sishga erishishingizga kim yoki nima oyog'ingizga bolta urgan?

- Birinchi galda o'zimni aybdor, deb hisoblayman. U vaqtlar yosh edim. Futbol men uchun xobbiy, 2-darajali bo'lgan. Har bir inson hayotida yaxshilikka ham, yomonlikka ham o'zini sababchi, deb bilishi kerak. 

- Futbolda armon yoki ushalmagan orzuingiz bormi?

- Armon yoki ushalmagan orzuim qolmadi. Osiyo chempionatida ikkinchi o'rinni oldim, Jahon chempionatida o'ynaganman. O'zbekiston chempioni va kubok sohibiman. Faqatgina shuncha yil "Qo'qon-1912"da to'p tepib, sovrindorlar qatoriga kira olmaganim afsus bo'lib qoldi.