"Bunyodkor" tanishtiruv marosimini o'tkazdi

Toshkent klubi mavsumlar oralig'ida Artyom Filiposyan, Otabek SHukurov, Obid Jo'raboev, SHaker Zuagi, Mirzohid G'ofurov va Eldor SHomurodov kabi futbolchilarni o'z safiga qo'shib oldi.

"Barchani yangi mavsum bilan tabriklaymiz, kelajakda barchaga omad tilayman. Oldimizga qo'yilgan vazifalarga kelsak, o'tgan yilgi mavsumni biroz muvaffaqiyatsiz tarzda o'tkazdik. O'tgan yilgi kamchiliklar, xatolarimizni o'rganib chiqdik. Yangi yilga, yangi mavsumga oldimizga yuqori maqsadlarni qo'ydik. O'z rejamizni tuzib chiqdik, bu reja bo'yicha ish olib borayapmiz. Jamoani shakllantirishda yo'l qo'yilgan xatolarni bartaraf etish, murabbiylar shtabini kuchaytirish va legionerlarni sotib olishda xatoga yo'l qo'ymaslikka intilamiz.

"Bunyodkor" o'z oldiga O'zbekiston chempioni bo'lish va mamlakat kubogini qo'lga kiritish, OCHLda yaxshi ishtirok etishni maqsad qilib qo'ygan. Jamoamiz bu yil o'zining 10 yilligini nishonlaydi, bu bayram chiroyli o'tishini taminlamoqchimiz", - deydi Baxtiyor Boboev.

"Yangi mavsumga tayyorgarlik rejadagidek kechdi. Barcha futbolchilar 17 fevraldagi o'yinga to'liq tayyorlar", - deydi Sergey Lushan.

- O'tgan yil jamoani shakllantirish borasida xatoga yo'l qo'yildi deyildi. Bunga nima deysiz?
Sergey Lushan: - 2014 yil jamoa mening qo'l ostimda bazi o'yinlarda o'zining bor kuchini ko'rsata olmagani rost. Masalan, "Dinamo" bilan o'yin. Tarkibni keskin yoshartirib yuborganim tufayli ham xatolar bo'ldi. Bu yilgi maqsadimiz barcha musobaqalarda g'olib chiqish. OCHLda muvaffaqiyatli ishtirok etish degan narsani tushunmayman, maqsadimiz doim birinchi o'rin. Tarkibimiz bir qator yoshlar bilan to'ldirildi. Mana shu yoshlar bilan mavsumni sovrinlar bilan o'tkazmoqchimiz.

 2015 yil yozida "Bunyodkor" klubi o'zining 10 yillik yubileyini o'tkazadi. Bu yilga maxsus yangi logotip ishlab chiqildi.

Bu yildan boshlab Sergey Lushanga tajribali murabbiy Amet Memet yordam beradi. Jismoniy tayyorgarlik bo'yicha ruminiyalik Avgustin CHirica ishlaydi. 


2012 va 2013 yillarda "qaldirg'ochlar" safida o'ynagan Artyom Filiposyan yana o'zining 16-raqamli formasida harakat qiladigan bo'ldi.

"Mashal"dan olingan yosh yarim himoyachi Otabek SHukurov 29-raqamga ega bo'ldi.

Faoliyati mobaynida oliy liganing bir qator klublarida o'ynagan Obid Jo'raboevga 15-raqam topshirildi.

Tunislik futbolchi SHaker Zuagi "qaldirg'ochlar" safida 7-raqamda o'ynaydigan bo'ldi.

Mirzohid G'ofurovga 11-raqamli futbolka topshirildi.

Muborakning "Mashal" klubida katta futbolga kirib kelgan Eldor SHomurodov o'ziga 39-raqamni tanladi.


SHu tariqa tanishtiruv marosimi o'z yakuniga etdi.

Narzulla Saydullaev