"Bunyodkor" "Navbahor" bilan o'yinda adolatsizlikka uchradimi? Superliganing 10-turidagi hakamlik faoliyati tahlili

✅ "Sho'rtan" - "Andijon"

Hakamning "Andijon" futbolchisiga qizil kartochka ko'rsatish va jarima zarbasi belgilash borasidagi yakuniy qarorini qo'llab-quvvatlayman. VAR bu epizodga to'g'ri aralashdi, chunki bu gol urish uchun yaqqol imkoniyatdan mahrum qilish holati edi. Birinchi navbatda shuni takidlash kerakki, "Andijon" himoyachisining yonida, agar hujumchi to'p uchun kurashda g'alaba qozonsa, to'pni olib qo'yishi mumkin bo'lgan sheriklari yo'q edi. Hujumning keyingi bosqichida hujumchi darvozabon bilan yakkama-yakka vaziyatga chiqish imkoniyatiga ega bo'lardi.

VIDEO

✅ "Sho'rtan" - "Andijon"

Bu vaziyatda ham hakamning yakuniy qarorini qo'llab-quvvatlayman. VAR yana epizodga to'g'ri aralashdi. "Sho'rtan" futbolchisini maydondan chetlatish uchun etarli asoslar topish qiyin: to'g'ri, u dastlab sakrab, oyog'ini baland ko'tardi, lekin keyin uni maysa ustiga tushirdi, to'qnashuv (kontakt) paytida raqib oyog'ini ezib yubormadi va "sindirmadi". Shu bilan birga, hakam o'zining dastlabki qaroriga mutlaq ishonch bildirmayotgandi. Norasmiy tavsiya: agar ishonchingiz komil bo'lmasa, biror qaror qabul qilmang. Ushbu vaziyatda hakam o'z qaroriga ishonchi komil bo'lmagani uchun, "engilroq jazo"ni tanlashi va darhol sariq kartochka ko'rsatishi lozim edi.

VIDEO

✅❌ "Bunyodkor" - "Navbahor"

Hakam uchun unchalik qiyin bo'lmagan holat. "Bunyodkor" o'yinchisi birinchi bo'lib to'pga tegingach, "Navbahor" himoyachisi uning oyog'idan chaldi. Penalti to'g'ri belgilandi. Bundan tashqari, qoidani buzgan o'yinchiga sariq kartochka ko'rsatilishi lozim edi (biroq hakam bu ishni amalga oshirmadi - tahririyat).

VIDEO

✅✅ "Bunyodkor" - "Navbahor"

VAR epizodga to'g'ri aralashdi, video ko'rikdan so'ng penalti to'g'ri belgilandi. "Bunyodkor" himoyachisining zarbani to'xtatishga urinib, sirpanib to'sish harakatini bajargan qo'li tanasidan uzoqlashgan va uning maydonini g'ayritabiiy tarzda kengaytirgan.

Penaltini qayta tepish qaroriga kelsak, bu erda ham hamma narsa to'g'ri. "Bunyodkor" darvozaboni qoidani buzmagan va "nuqta"dan berilgan zarbani qaytargan. Biroq shu paytda "Bunyodkor" sardori zarbadan oldin jarima maydoniga kirib kelgan va birinchi bo'lib to'pni tepib yuborgan. Qizig'i, penalti takroran ijro etilganda ham "Bunyodkor" sardori yana muddatidan avval jarima maydoniga kirgan, ammo bu safar avvalgidek yaqqol holatda emasdi. Agar darvozabon zarbani yana qaytarganida va sardor yana to'pga tekkanda, hakam penaltini qayta belgilashga majbur bo'lardi.

VIDEO

✅ "Bunyodkor" - "Navbahor"

VARning to'g'ri aralashuvi natijasida "Bunyodkor"ning goli bekor qilindi. Hujum fazasidagi qoida buzilishi sodir etilgan: "Bunyodkor" o'yinchisi "Navbahor" futbolchisining libosidan ushlab qoldi, shu tariqa uni kurashdan chiqarib yubordi va zarbani to'sishga urinish imkoniyatidan mahrum qildi.

VIDEO

✅ "Bunyodkor" - "Navbahor"

Dastlab "Navbahor" jamoasi o'yinchisi qo'pollik ishlatdi. "Bunyodkor" o'yinchisining qo'polligi xususida esa - raqib bilan to'qnashuvda tasir darajasi aniq ko'rinmadi. Hakamning epizodni ko'rish uchun monitor qarshisiga borishi o'rinli edi. U o'zining dastlabki qarorini sariq kartochka ko'rsatishga o'zgartirish uchun etarli asosga ega bo'ldi.

VIDEO

✅ "Xorazm" - "Mashal"

Mening fikrimcha, hakam o'yinni to'g'ri ravishda davom ettirdi. To'p aslida "Xorazm" himoyachisining qo'liga tegmadi, agar tekkan bo'lsa ham, bu darvozabon to'pni qaytargandan keyin sodir bo'ldi. Bunday holatlarda to'pning qo'lga tegishi jazolanmaydi. Shuningdek, qo'l pastda va tanaga yopishgan edi. To'pning holatiga kelsak, u darvoza chizig'ini kesib o'tmadi.

VIDEO

✅❌ "Qizilqum" - "Paxtakor"

"Qizilqum" darvozasiga belgilangan penalti to'g'ri qaror hisoblanadi. Himoyachi to'pga o'ynamoqchi bo'lib, "Paxtakor" o'yinchisining oyog'iga urildi va uni harakatdan to'xtatdi. Bu holatda penalti belgilanishi va qoidabuzarga sariq kartochka ko'rsatilishi lozim (biroq hakam "Qizilqum" futbolchisiga sariq kartochka ko'rsatmadi - tahririyat).

VIDEO

Shu tariqa, Superliganing 10-tur o'yinlarida hakamlar ikkita xatoga yo'l qo'yishdi. Ikkala holatda ham penalti belgilangan epizodlar uchun sariq kartochkalar ko'rsatilmadi.