"Bunyodkor" bugundan mashg'ulotlarni boshladi. Tarkibda 3 nafar yangi futbolchi bor

“Bunyodkor” akademiyasi maydonida boshlangan bugungi mashg'ulotlarda 20 nafar futbolchi ishtirok etdi. SHuhrat Maqsudov boshchiligidagi murabbiylar shtabi yig'inning ilk kunidagi mashg'ulotlarda o'yinchilarga katta yuklamalar bergani yo'q. Futbolchilar maydonda to'p bilan ishladi va engil jismoniy mashg'ulotlarni bajarishdi. Mashg'ulotlarga Suhrob Sultonov, Dilshod Jo'raev va Usmonali Ismonaliev jalb etilgan.

Jamoamiz bilan amalda shartnomasi bor Suhrob Izzatov, Odiljon Abdurahmonov, Davronjon Ergashev tez kunlarda mashg'ulotlarga qo'shiladi. Jarohatini davolatayotgan Rasul Yo'ldoshev esa, bir necha kundan so'ng umumiy guruh bilan mashg'ulotlarni boshlaydi. 

Bugun boshlangan yig'in 2 fevralga qadar Toshkentda davom etadi. Bu muddat oralig'ida jamoamiz oltita nazorat o'yinida maydonga tushadi. Dastlabki raqib “Qo'qon-1912”. Uchrashuv 15 yanvarda bo'lib o'tishi rejalashtirilgan. Tayyorgarlikning so'nggi bosqichi Turkiyada o'tkaziladi. “Bunyodkor” rejaga ko'ra 5 fevral kuni Turkiyaga yo'l oladi. 

Bugungi mashg'ulotlarda ishtirok etgan futbolchilar – Ravshan Yagudin, Sarvar Karimov, Zafar Safoev, Suhrob Sultonov, Avazbek O'lmasaliev, Bilol Tupliev, Jahongir Abdusalomov, Usmonali Ismonaliev, Dilshod Jo'raev, Muhammadodil Qahramonov, Dian Talxatov, G'ayrat Azizxo'jaev, Umid Sultonov, Sanjar Rixsiboev, Aziz Pirmuhammadov, Muzaffar Olimjonov, Xurshid Ubaydullaev, Bek Abdullaev, Alfayzi Nematov, Umarali Rahmonaliev.