Bundesliga: 26-tur prevyusi

Ko'z ochib yumgunga qadar bir hafta ham o'tdi va yana bundesliga o'yinlaridan baxra olish imkoniyatiga egamiz. Bir necha soatdan so'ng olmon o'lkasida 26-turga start beriladi. Etiborga sazovor jihati shundaki, mazkur tur butun mavsum taqdirini hal qilishi mumkin bo'lgan uchrashuv kunlaridan biri sanaladi. Boisi, ertaga chempion nomini bilib olishimiz mumkin bo'ladi. Kim birinchilik g'olibi bo'lishi shundoq ham tushunarli. Ammo ushbu voqeaning qachon sodir bo'lishi ko'pchilikni qiziqtirmoqda. Xo'sh, "Bavariya" nechanchi turda bundesliga g'olibi laganiga ega chiqar ekan… Balki, ertagayoq "Gollivud FK" muxlislari navbatdagi chempionlikni bayram qilish imkoniga ega bo'lishar… Ko'rib turganingizdek, 26-turning ahamiyati ancha yuqori. "Championat.asia" esa siz – aziz muxlislarni ushbu tur doirasidan o'rin olgan barcha uchrashuvlarning o'yinoldi tafsilotlari bilan tanishtirib o'tadi.



Tur doirasidan quyidagi bahslar o'rin olgan:
22.03 00:30 da   Frayburg - : - Verder Bremen
22.03 19:30 da   Maync - : - Bavariya
22.03 19:30 da   SHalke 04 - : - Ayntraxt B
22.03 19:30 da   Volfsburg - : - Augsburg
22.03 19:30 da   Gannover 96 - : - Borussiya D
22.03 19:30 da   SHtutgart - : - Gamburg
22.03 22:30 da   Borussiya M - : - Gerta Berlin
23.03 19:30 da   Nyurnberg - : - Ayntraxt F
23.03 21:30 da   Bayer Leverkusen - : - Xoffenxaym
       
Endi esa bevosita har bir uchrashuvga qisqacha to'xtalib o'tamiz:

"FRAYBURG" - "VERDER"
Stadion: "Mage Solar shtadion"
Boshlanish vaqti: 00:30 22.03.2014

Turni  "Frayburg" - "Verder" uchrashuvi ochib beradi. "Mage Solar shtadion"da o'tkaziladigan mazkur bahsga bo'lgan muxlislarning etibori ancha yuqori. Boisi ikki jamoa ham mavsumni juda yomon tarzda o'tkazib kelishdi. Birinchi davraning ilk turlaridayoq boshlangan muvaffaqiyatsizliklar frayburgliklarni ham, bremenlik futbolchilarni ham ikkinchi davra o'rtalarigacha taqib qilib keldi. Lekin jamoalarning so'nggi uchrashuvlariga etibor qaratadigan bo'lsak, biroz bo'lsa-da ijobiy o'zgarishlarga ko'zimiz tushadi. SHu o'rinda omadsizliklar haqida gapiradigan bo'lsak, "Verder"ni bu borada 2013-2014 mavsumning "eng kuchli jamoasi" deyishimiz mumkin. Zero, bundesliga etakchilari qatorida etirof etilib kelinadigan jamoa joriy mavusmda juda ham yomon o'yin ko'rsatdi. Ketma-ket qabul qilingan mag'lubiyatlar va duranglar oqibatida "mashshoqlar" jamoasi turnir jadvali o'rtasidan joy egallab turishibdi. Hozirda ushbu jamoa hisobida 29 ochko mavjud. Ammo klub rahbariyatining murabbiy va futbolchilar oldiga jiddiy talablar qo'yganidan so'ng, holat biroz bo'lsa ham o'zgardi. Xo'sh, "Verder" qolgan turlarni ijobiy natijalar bilan yakunlay olarmikan?! Jamoa o'z muxlislarini yana g'alabalar bilan xushnud eta olarmikan?! Buning uchun "Frayburg" to'sig'idan o'tish lozim bo'ladi. Ko'ramiz, "mashshqolar" bu imtihonni necha bahoga topshirishar ekan…
"Championat.asia" taxmini: 50 % - 50 %



"MAYNC" - "BAVARIYA"
Stadion: Kofeys arena
Boshlanish vaqti: 19:30 22.03.2014

Ko'plab futbol shaydolari intiqlik bilan kutayotgan bellashuv esa ertaga "Kofeys arena"da bo'lib o'tadi. Unda "Maync" va "Bavariya" jamoalari o'zaro to'qnash kelishadi. Uchrashuvning ko'pchilikda qiziqish uyg'otganiga sabab – mazkur bellashuv yakunida chempionat g'olibi nomi aniq bo'lishi mumkin ekanidir. Qanday qilib deysizmi?! Pep Gvardiola ustozlik qilayotgan "Bavariya" mavsum yakunlanishidan 8 ta tur oldin oltin medallar masalasini o'zi uchun ijobiy hal qilib qo'yishi mumkin, agar… Agar "Gollivud FK"ning asosiy taqibchilari bo'lmish - "Borussiya D" va "SHalke 04" jamoalari mazkur turda mag'lubiyatga uchrasalar. Ammo ushbu ikki jamoa bahs yuritadigan raqiblarning salohiyatidan kelib chiqsak, bu voqeaning amalga oshishi biroz qiyin ekaniga amin bo'lamiz. Agar "Bavariya" ertaga chempionlikni naqd qilib qo'ymasa ham jamoa muxlislarining hafa bo'lishlariga xojat yo'q. Boisi jamoa kelasi turda ham g'alaba qozonish orqali chempionlikka erishishi mumkin  bo'ladi. Keyingi turda raqiblarning o'yinlari natijasining ahamiyati ham bo'lmaydi. SHunday bo'lsa-da myunxenliklarning ashaddiy muxlislari sevimli jamoalarining 26-turdayoq chempionat g'olibligini qo'lga kiritishlariga umid qilishmoqda. Ko'rib turganingizdek, mazkur bahsni tomosha qilish uchun ham etarlicha sabablar bor. Kuzatamiz, "Bavariya" ertaga muxlislariga navbatdagi chempionlikni tuhfa etarmikan…
"Championat.asia" taxmini: 40 % - 60 %

 
"SHALKE 04" - "AYNTRAXT B"
Stadion: Veltins arena
Boshlanish vaqti: 19:30 22.03.2014

Gelzenkirxenliklar uchun "Ayntraxt B"ga qarshi kechadigan bahs juda katta ahamiyatga ega. Jamoa qanday bo'lmasin uchrashuvda g'alaba qoznishi talab etiladi. Yo'qsa, klub kumush medallar uchun kechayotgan kurashda o'z imkoniyatlarini ancha pasaytirib yuboradi. Qolaversa, "SHalke 04"ning ochko yo'qotishi Leverkuzenning "Bayer" jamoasi uchun qo'l kelishi mumkin. SHu boisdan ham gelzenkirxenlik futbolchilar mazkur bellashuvga o'zgacha ruhda tayyorgarlik olib borishdi. Raqibning egallab turgan o'rniga etibor qaratsak, "SHalke 04" uchun ushbu bahs unchalik qiyinchilik tug'dirmaydi, deb o'ylashimiz mumkin. Ammo Germaniya bundesligasida har bir jamoadan etarlicha qarshilik kutish mumkin. SHuni inobatga olgan holda, "Veltins arena"da bo'lib o'tadigan bellashuvni ham murosasiz bahslarga boy tarzda kechadi, deb ayta olamiz.   
"Championat.asia" taxmini: 60 % - 40 %



"VOLFSBURG" - "AUGSBURG"
Stadion: Folksvagen arena
Boshlanish vaqti: 19:30 22.03.2014

Tur doirasidan o'rin olgan yana bir match Volfsburg shahrida joylashgan "Folksvagen arena"da bo'lib o'tadi. Unda mezbon - "Volfsburg" "Augsburg"ni qabul qiladi. Ushbu ikki jamoa to'qnashuviga bo'lgan etibor ham ancha yuqori. Bunga bir qator sabablar bor: Birinchidan ikki jamoa ham ancha mazmunli va chiroyli o'yin ko'rsatmoqda. Qolaversa, ikkala "burg" ham Evrokuboklarda ishtirok etish imkonini beruvchi o'rinlar uchun kurashishmoqda. SHu jihatlarni inobatga olib, mazkur bellashuvning anchagina qiziq o'tishini taxmin qilish mumkin. Turnir jadvalida oltinchi va sakkizinchi pog'onalarni band etib turgan "Volfsburg" va "Augsburg" jamoalari bellashuvini tomosha qilishga barchangizni taklif etamiz. Ishonamizki, bellashuv sizni zeriktirib qo'ymaydi.
"Championat.asia" taxmini: 55 % - 45 %


"GANNOVER" - "BORUSSIYA D"
Stadion: HDI arena
Boshlanish vaqti: 19:30 22.03.2014

26-turda "Gannover" mexmoni bo'ladigan "Borussiya" Dortmund uchun bu bahsning qiyin o'tmasligini taxmin qilish mumkindek, bir qarashda. Ammo bu shunchaki ilk taassurot, xolos. Boisi "Gannover" o'z uyida hech bir jamoga osonlikcha ochko ulashmaydi. Bundan tashqari, Klopp shogirdlari so'nggi vaqtda yana nursiz o'yin ko'rsata boshladi. "Borussiya D"ning oxirgi o'yinlariga etibor qaratsak, yana mag'lubiyatlar qayd etilayotganiga ko'zimiz tushadi. Lekin jamoa musobaqa jadvalida ikkinchi o'rinda bormoqda. "Bavariya"ning chempionlikka erishishi bir jihatdan "sariq-qoralar" qo'lida ekan, "Borussiya D" mazkur uchrashuvda albatta zafar quchadi. Nima bo'lganda ham, principial raqiblariga dortmundliklar bunday shirin onlarni tezroq qo'lga kiritish imkonini shunchaki berib qo'yishmasa kerak. Nima dedingiz, aziz muxlis…  
"Championat.asia" taxmini: 45 % - 55 %



"SHTUTGART" -  "GAMBURG"
Stadion: Mersedes Benc arena  
Boshlanish vaqti: 19:30 22.03.2014

Boshqa bellashuvlarga qaraganda "Mersedes Benc arena"da o'tkaziladigan uchrashuvga bo'lgan muxlislar etibori biroz pastroqdek. Ha, chindan ham. Jamoalarning turnir jadvalida egallab turgan o'rinlarini inobatga oladigan bo'lsak, shunday bo'lishi ham kerak. Ammo bu mazkur bahs zerikarli o'tishini anglatmaydi. Zero, har ikkala jamoa uchun ham ochko juda va juda zarur.Yo'qsa, bir necha yillar avval ham sovrinli o'rinlarni qo'lga kiritib kelgan "SHtutgart"dek jamoa kelasi mavsumni ikkinchi bundesligada o'tkazishiga to'g'ri keladi. Qimmatli ochkolarning qo'lga kiritilishi ikkala jamoaga ham xavfli zonadan uzoqlashish imkonini beradi. SHu boisdan, uchrashuvning ancha murosasiz ruhda o'tishini taxmin qilishimiz mumkin.
"Championat.asia" taxmini: 50 % - 50 %


"BORUSSIYA M" - "GERTA"
Stadion: Borussiya Park  
Boshlanish vaqti: 22:30 22.03.2014

Ertaga Myonxengladbaxning "Borussiya"si "Gerta"ni qabul qiladi. Mazkur bellashuvning ham ancha keskin ruhda o'tishi taxmin qilinmoqda. Boisi ikki jamoa ham bundesligadagi o'rinlari bo'yicha deyarli qo'shni bo'lib turishibdi. Qolaversa, jamoalarning oldiga qo'yilgan vazifa ham bir xil: Hech bo'lmaganda, Evropa Ligasiga yo'l olish. Demak, ikki jamoa ham faqat uch ochko uchun maydonga chiqishadi. Yana bir jihatga etibor qaratsak, mazkur matchda g'alaba qozongan jamoa nafaqat uch ochkoni qo'lga kiritadi. Balki raqibni uch ochkodan maxrum ham etadi. SHuni inobatga olib aytadigan bo'lsak, "Borussiya Park"da bo'lib o'tadigan mazkur bellashuvni ham tomosha qilsak bo'ladi.
"Championat.asia" taxmini: 60 % - 40 %


"NYURNBERG" - "AYNTRAXT F"
Stadion: Grundig shtadion  
Boshlanish vaqti: 19:30 23.03.2014

"Grundig shatdion"da bo'lib o'tadigan "Nyurnberg" - "Ayntraxt F" uchrashuvining ham keskin va murosasiz kurashlarga boy tarzda o'tishi kutilmoqda. Xavfli zonadan iloji boricha uzoqlashish harakatiga tushib qolgan ushbu ikki jamoa uchun qo'lga kiritiladigan har qanday ochkoning qadri baland. SHu boisdan ham matchning ancha qizg'in o'tishi taxmin qilinmoqda. Ayniqsa, nyurnberglik futbolchilar bu uchrashuvga o'zgacha tayyorgarlik ko'rishdi. Jamoa o'z muxlislari ko'z oldida to'p suradi. SHuning uchun ham jamoa mazkur matchga katta masuliyat bilan qaramoqda. Ko'ramiz, ikki "ochkoga tashna" jamoalar bahsida kimning qo'li baland kelar ekan…
"Championat.asia" taxmini: 45 % - 55 %



"BAYER" - "XOFFENXAYM"
Stadion: BayArena   
Boshlanish vaqti: 21:30 23.03.2014

26-turning so'nggi uchrashuvi yakshanba kuni Germaniyaning eng ko'rkam stadionlaridan biri bo'lmish muxtasham "BayArena"da bo'lib o'tadi. Unda "Bayer" va "Xoffenxaym" jamoalari o'zaro to'qnash kelishadi. Mazkur jamoalar bellashuvi ham ko'pchilik muxlislar etiborini tortgan. Zero, "Bayer"ning medallar uchun kechayotgan bahsdan chiqib ketish yoki chiqib ketmaslik masalasi taqdiri aynan ushbu uchrashuvdan so'ng aniq bo'ladi. Agar "dorishunoslar" Zinsxaym klubini mag'lub eta olsa, "Bayer" muxlislari kumush yoki bronza uchun umid qilish imkoniga ega bo'lishadi. Yo'qsa, barchasi "Bayer" uchun boshqacha ko'rinish olishi mumkin. Buni chuqur xis etib tirgan Sami Xyupiya jamoasi mazkur bahsga qattiq tayyorgarlik ko'rdi. Biroq "Xoffenxaym" ham osonlikcha mag'lub bo'ladigan jamoalar sirasiga kirmaydi. Bu jamoa ham qattiq qarshilik ko'rsatishiga shubxa yo'q. Demak, so'nggi match ham ancha qizg'in va murosasiz tarzda kechadi.
"Championat.asia" taxmini: 55 % - 45 %

To'purarlar  bahsi:
To'purarlar bahsi ham borgan sayin qizib bormoqda. Bir-biridan o'zishga intilayotgan uch hujumchi – Mandjukich, Levandovski va Ramoslar bahsi ajoyib tarzda kechmoqda. Bir futbolchi gol ura olmagan turda ikkinchisi, albatta, to'p kiritmoqda va etakchilikni o'z qo'liga olmoqda. Bu safar ham shunday bo'larmikan?! Ko'ramiz, voqealar qay tarzda rivoj oladi… 

#	O'yinchi	Jamoa	Gollar
1	Mario Mandjukich	Bavariya Myunxen	17
2	Robert Levandovski	Borussiya Dortmund	15
3	Adrian Ramos	Gerta Berlin	15
4	Rafael	Borussiya M	13
5	Roberto Firmino	Xoffenxaym	13
6	Pier-Emerik Obameyang	Borussiya Dortmund	13

 
Bugunga kelib musobaqa jadvali quyidagicha ko'rinish olgan:

#	Jamoa	O'	YU	D	M	T-N	Och
1	Bavariya	25	23	2	0	62	71
2	Borussiya D	25	15	3	7	27	48
3	SHalke 04	25	14	5	6	12	47
4	Bayer	25	14	2	9	12	44
5	Maync 05	25	12	5	8	-1	41
6	Volfsburg	25	12	4	9	3	40
7	Borussiya M	25	11	6	8	11	39
8	Augsburg	25	11	5	9	2	38
9	Gerta Berlin	25	10	6	9	4	36
10	Xoffenxaym	25	7	8	10	-2	29
11	Gannover	25	8	5	12	-9	29
12	Verder Bremen	25	7	8	10	-18	29
13	AyntraxtF	25	6	8	11	-16	26
14	Gamburg	25	6	5	14	-13	23
15	Nyurnberg	25	4	11	10	-16	23
16	Frayburg	25	5	7	13	-20	22
17	SHtutgart	25	5	6	14	-13	21
18	Ayntraxt B	25	4	6	15	-25	18

Aziz bundesliga muxlislari, ko'rib turganingizdek, navbatdagi tur doirasidan o'rin olgan uchrashuvlar orasida qiziq va keskin kurashlarga boy tarzda o'tishi kutilayotganlari talaygina. Boz ustiga ertaga navbatdagi chempion nomi aniq bo'lishi mumkin. Demak, tur doirasidan o'rin olgan uchrashuvlarni kuzatishimiz uchun sabablar etarli. Biz sizlarga ushbu bellashuvlarni kuzatishni maslahat beramiz. Zero, bundesliga o'yinlarini kuzatish orqali yana bir bor Evrofutbol havosidan bahra olish imkoniga ega bo'lamiz.

Keling ushbu imkoniyatni qo'ldan boy bermaymiz!
Bundesligani ko'ring! Bundesligaga muxlislik qiling! Ketkazgan vaqtingizga aslo achinmaysiz!

Zoxirjon AKRAMXONOV.