Bugun futbol. "Paxtakor" - "Bunyodkor"

Turnir jadvalida har ikkala jamoa yonma-yon o'rinlarda bormoqda. "Paxtakor" 26 ochko bilan birinchi o'rinni egallab turgan bo'lsa, "Bunyodkor" 25 ochko to'plagan holda ikkinchi o'rinni band etib turibdi.

Esingizda bo'lsa, "Bunyodkor" stadionida bo'lib o'tgan birinchi o'yinda maydon egalari 1:0 hisobida g'alaba qozonishgandi. O'yinda "Bunyodkor" hisobni ochgani, oxirgi daqiqalarda penalti qo'yilgani, ammo Jasur Hakimov gol ura olmagani - hamon ko'pchilikning yodida. Bir so'z bilan aytganda, qiziq derbi bo'lgandi.

Bugun ham jamoalardan shiddatli to'qnashuv kutib qolamiz. O'tgan yil "Paxtakor" stadionida kechgan bahs ancha bahs-munozaralarga boy bo'lgandi. Taloto'p ichida urilgan gol, hisob olib-olinmagani, xullas rosa tortishuv bo'lgandi. Bugun qanday o'yin bo'lishini esa uchrashuv davomida ko'ramiz.

Statistikaga etibor beradigan bo'lsak, "Paxtakor" oxirgi to'rtta o'yindan ikkitasini durang, yana ikkitasini g'alaba bilan yakunladi. Umuman olganda, "Paxtakor" 6-turdan beri mag'lub bo'lgani yo'q. Jamoa so'nggi bor Buxoroda 0:1 hisobida imkoniyatni boy bergan.

Bilasizmi? "Paxtakor" o'z maydonida o'tkazilgan 6ta bellashuvdan beshtasida zafar quchgan va bir marta durang o'ynagan. To'plar nisbati 11-3.

Fakt: "Paxtakor" bu yilgi chempionatda o'z maydonida hali yutqazmagan uch jamoadan biri. Yana ikkitasi: "Navbahor" va "Lokomotiv".

"Bunyodkor" haqida to'xtaladigan bo'lsak, bu jamoa mavsumni juda yaxshi boshladi. Avvaliga o'z maydonida AGMK bilan durang o'ynagan "qaldirg'ochlar" shundan so'ng qatorasiga beshta o'yinda g'alabaga erishishdi. Ammo orada uchta mag'lubiyat yuz berdi. Keyin esa "Bunyodkor" yana qatorasiga uchta bellashuvda zafar quchdi.

Bilasizmi? "Bunyodkor" safar o'yinlarida eng ko'p ochko yiqqan jamoa bo'lib turibdi - 12ta.

Fakt: "Bunyodkor" bu yil safarda to'rt bor zafar quchib, ikki marta mag'lub bo'ldi va hali durang o'ynamadi.