Bugun futbol. "Navbahor" - "Paxtakor"

Namanganda "Navbahor" "Paxtakor"ga qarshi bahs olib boradi. Aytish mumkinki, bu turning markaziy o'yinlaridan biri. Turnir jadvalida "Paxtakor" 12 ochko bilan etakchilik qilmoqda. Jamoa 4ta o'yinning hammasida g'alaba qozongan. 

"Navbahor" esa 4 uchrashuvdan so'ng 4 ochko jamg'argan holda 8-o'rinni egallab turibdi. Hozirgacha o'z maydonida ikkita uchrashuv o'tkazgan "Navbahor" bir mag'lubiyat va bir durang qayd etdi. "Lochinlar" ilk turda "So'g'diyona"ga imkoniyatni boy berib qo'ygach, No'mon Hasanov istefoga chiqarildi. Oxirgi uch turdan beri jamoaga Viktor Jalilov murabbiylik qilib kelayotganini juda yaxshi bilasiz. 

Viktor Romanovich qo'l ostida uchta o'yin o'tkazgan "Navbahor" safarda "Loko"ni mag'lub etib, o'z maydonida "Nasaf" bilan durang o'ynadi va o'tgan tur Olmaliqda AGMKga mag'lub bo'ldi. Ko'rinib turibdiki, namanganliklar yangi murabbiy boshchiligida faqat bir bellashuvda zafar quchishdi. 

"Paxtakor" esa aytib o'tganimizdek, to'rtta bahsning hammasida g'alabaga erishdi. Piter Xyuistra bosh murabbiy bo'lganidan keyin "Paxtakor" yangi murabbiyning o'yin uslubiga ko'nikishga harakat qilyapti. 

Albatta, bugun Markaziy stadionda hech bir jamoaga oson bo'lmaydi. Qizig'i shundaki, o'tgan tur AGMK "Navbahor" bilan o'ynab OCHLga jo'nab ketgandi, bu tur esa "Paxtakor" "Navbahor"ga qarshi bahsdan so'ng OCHL guruh bahslarini o'tkazish uchun SHarjaga yo'l oladi.