Bugun futbol. "Navbahor" - "Bunyodkor"

O'yindan nima kutyapmiz? Bu jamoalarning o'zaro to'qnashuvida kimning g'alaba qozonishini aytish qiyin. Lekin bahs juda qiziqarli kechishi kutilmoqda. Negaki ikkala jamoa ham oxirgi o'yinlarda g'alaba qozona olmayapti. 

Fakt: "Navbahor" uydagi o'yinlarda 12 ochko to'plagan. Jamoa uchta o'yinda g'alabaga erishgan bo'lsa, yana shuncha marta durang o'ynagan. To'plar nisbati 8-5. "Navbahor" o'z maydonida "Obod", "Mashal" va "SHo'rtan" klublaridan ustun kelgan. 

Bilasizmi? "Navbahor" o'z maydonida hali mag'lub bo'lmagan to'rtta klubdan biri hisoblanadi. SHuningdek, "Lokomotiv", "Nasaf", "Olmaliq" klublari ham uyda yutqazmagan. 

Fakt: "Navbahor" oxirgi uchta o'yinni durang natija bilan yakunladi. Jamoa oxirgi marta 22 aprel kuni "SHo'rtan"ni 1:0 hisobida mag'lub etgan. 

Fakt: Bu "Bunyodkor"ning ushbu mavsum hisobidan vodiyga ikkinchi safari bo'ladi. Birinchi safarda "Bunyodkor" "Neftchi"ni 2:1 hisobida mag'lub etib qaytgan. Qolaversa, mazkur g'alaba "Bunyodkor"ning safar o'yinlaridagi yagona g'alabasi bo'lib turibdi. 

Bilasizmi? "Bunyodkor" Farg'onada g'alaba qozonib qaytganidan beri ketma-ket beshta uchrashuvda yuta olmadi. Jamoa uch bor durang o'ynagan bo'lsa, ikki marta mag'lub bo'ldi. Qolaversa, ikkala mag'lubiyat ham safardagi o'yinlarda ro'y berdi.