"Металлург" ўз майдонида "Қўқон-1912" билан баҳс олиб боради. Учрашув 18:30да старт олади. Мусобақа жадвалида "Металлург" 7 очко жамғарган ва 7-ўринни эгаллаб турибди. "Қўқон-1912" ҳисобида эса 5 очко очко мавжуд бўлиб, бу жамоа 13-ўринда боряпти.
"Металлург" шу пайтгача икки бор ғалаба қозонди ва иккаласи ҳам уйдаги ўйинларда қўлга киритилди. Бекободликлар дастлаб "Бухоро"ни 2:0, ундан кейин "Қизилқум"ни 4:1 ҳисобида мағлубиятга учратишди. Бугун "Металлург" ўз уйида учинчи ўйинини ўтказади.
Бунгача сафарда уч бор майдонга тушган "Қўқон-1912" уч хил натижа қайд этди. Нўъмон Ҳасанов шогирдлари дастлаб "Навбаҳор" билан 1:1 ҳисобида дуранг ўйнашди. Кейин Олмалиқда 1:7 ҳисобида мағлубиятга учрашди ҳамда ўтган тур Навоийда 1:0 ҳисобида зафар қучишди. Бу "Қўқон-1912"нинг янги мавсумдаги илк ғалабаси бўлди.
Жамоаларнинг ўзаро охирги бешта ўйини:
2018 йил. "Металлург" - "Қўқон-1912" 1:0
2017 йил. "Металлург" - "Қўқон-1912" 3:0
2016 йил. "Металлург" - "Қўқон-1912" 3:1
2015 йил. "Металлург" - "Қўқон-1912" 2:1
2003 йил. "Металлург" - "Қўқон-1912" 3:1
Бекобод шаҳрида кечган охирги бешта учрашувнинг ҳаммасида майдон эгалари зафар қучишган. Тўплар нисбати 12-3. Яна шуни айтиш лозим, "Қўқон-1912" охирги икки ўйиндан бери сафарда "Металлург" дарвозасига тўп кирита олмаяпти. Бугунги беллашувда ҳам мезбонларнинг имконияти юқори баҳоланмоқда.
