Bugun futbol. "Mashal" - "So'g'diyona"

"Mashal" Muborakda "So'g'diyona"ni qabul qiladi.

Oliy liga, 22-tur. 16 sentyabr

MASH'AL - SO'G'DIYONA

Turnir jadvalidagi o'rni: "Mashal" 10-o'rinda (23 ochko), "So'g'diyona" 8-o'rinda (26 ochko).

Ochkolar orasidagi farq - 3 ochko.

Tarif: Atigi uch ochko farq bilan borayotgan jamoalar bahsi. Agar bugun "Mashal" zafar quchgudek bo'lsa, ochkolar bo'yicha "So'g'diyona"ga tenglashib oldi. Mabodo "So'g'diyona" g'alaba qozonsa, "Paxtakor" bilan bir xil o'ringa ko'tarilib oladi. SHunday ekan, Muborakda o'ziga yarasha qiziq bahs kechishi kutilmoqda.

Fakt: Bugun "Mashal" o'z maydonida 10-uchrashuvni o'tkazadi. SHu paytgacha bo'lib 9ta o'yindan beshtasini g'alaba bilan yakunlagan muborakliklar bir marta durang o'ynab, uchta bellashuvda yutqazib qo'yishgan. To'plar nisbati 15-9. "Mashal" o'z uyida 16 ochko to'plagan. "So'g'diyona" esa safarda hozircha 10 marta to'p tepib, faqat ikki marta g'alaba nashidasini surgan. Bir bor durang qayd etgan bo'lsa, 7ta bahsda mag'lub bo'lgan. To'plar nisbati 9-19.

Fakt: "Mashal" ikkinchi davrada hozircha faqat bir marta g'alaba qozondi. Jamoa safarda "Neftchi"dan ustun keldi. "So'g'diyona" esa uch bor zafar quchdi. Aytish mumkinki, jizzaxliklar oxirgi ikkita o'yinni g'alaba bilan yakunlashdi. Ammo jamoa safardagi ikkita bellashuvda mag'lub bo'ldi.

Eslatma: Jizzaxda kechgan birinchi davra uchrashuvida "So'g'diyona" 1:0 hisobida g'alaba qozongan. Kecha o'tkazilgan Yoshlar ligasi bahsida esa maydon egalari 2:1 hisobida g'olib bo'lishdi.