Bugun futbol. "Buxoro" - "So'g'diyona"

Turnir jadvalidagi o'rni: "Buxoro" 4-o'rinda (52 ochko), "So'g'diyona" 10-o'rinda (34 ochko).

Ochkolar orasidagi farq: 18 ochko.

Tarif: CHempionatni kuchli uchtalikda yoki bo'lmasa to'rtinchi o'rinda tugatishga harakat qilayotgan "Buxoro" bu turda "So'g'diyona"ga qarshi bahs olib boradi. Agar bugun buxoroliklar zafar quchadigan bo'lishsa, o'zlari uchun to'rtinchi o'rinni naqd qilib qo'yishadi. CHunki keyingi ikki turda "Buxoro" yutqazgan, "Paxtakor" g'alaba qozongan taqdirda ham ochkolar orasidagi farq bitta bo'lib qoladi.

Mana shu bois ham "Buxoro" o'z maydonida g'alaba qozonishga harakat qilib ko'radi. "So'g'diyona" esa katta ehtimol bilan Oliy ligani yuqori o'ntalikda tugatadi. Har holda jamoa o'ninchi o'rindan pastga tushmasa kerak. Bugungi o'yinda jizzaxliklarni durang ham qoniqtiradi. Zero, ular "Buxoro" o'z uyida qanday kuchli futbol namoyish etishini juda yaxshi bilishadi.

Fakt: "Buxoro" jamoasi ikkinchi davrada o'zida o'tkazilgan beshta uchrashuvdan to'rttasini g'alaba bilan tugatdi va bir marta durang qayd etdi. Tarkib jihatdan yaxshi shakllangan Jamshid Saidov shogirdlari uyda har qaysi raqibga etarlicha boshog'riq tug'dira olishadi. Jamoa o'z maydonida ikki bor mag'lub bo'lgan: "Nasaf" va "Mashal"ga qarshi kechgan bahslarda.

Fakt: "So'g'diyona" esa asosan uy jamoasi hisoblanadi. Davron Fayziev shogirdlari hozircha ikkinchi davrada beshta bahsni safarda o'tkazib, shundan bittasida g'alaba qozonishdi. Bir marta durang qayd etilgan bo'lsa, uchta o'yinda "So'g'diyona" mag'lub bo'ldi.