Bu qiziq, Dohadagi bugungi kun...

Aslida bo'sh bo'ldik deb aytish ham noto'g'ri bo'lardi. Bu safargi kundalikni birinchi marta video shaklida berayotganimiz uchun navbatdagi syomkani o'tkazish uchun, Doha qirg'oqlaridan biriga borishga harakat qildik. Kecha Dohada bo'lib turgan muxlislar bilan kelishgan holda, ulardan biri bugungi kunimiz qahramoni bo'ldi.

Zafar Qosimovning ozroq ishi borligi tufayli bu jarayonda ishtirok etmasligini bildirdi. Qolganlar esa tayyor edik. SHu tariqa Akramjon Mamadaliev, Davron Fayziev, Hasan Pirmuhammedov, men va Tolibjon Qosimov ishimizni boshlab yubordik. Qirg'oq yaqiniga borgach, o'sha erda turgan kema taksilardan narx-navoni o'rgana boshladik. 250 realdan boshlagan boshqaruvchilar, 100 realga ko'nib bizni Doha markazi tomon suzdirib ketdilar. Aynan shu erda ish jarayoni ham boshlandi.

Akramjon aka, men va Tolib kundalik uchun ishladik. Qahramonimiz - "Qo'qon-1912" jamoasining ashaddiy muxlisi, Mahmudxo'ja aka. U kishini tanlashimizga sabab, 2011 yilda bo'lib o'tgan Osiyo Kubogida ham Qatarga tashrif buyurganlari bo'ldi. Biz bilan parallel ravishda Davron Fayziev "Sport TV" uchun lavha tayyorladi, Hasan Pirmuhammedov esa tabiat manzaralarini suratga oldi.

Doha kichik shahar bo'lgani bilan, o'z ichiga juda ko'plab sport inshootlarini oladi. Yaqinda mazkur shaharda gandbol va boks bo'yicha jahon chempionati bo'lib o'tgandi. Gandbol uchun qurilgan maxsus arena uch qavat bo'lib, o'z ichiga bir nechta zalni oladi.

Davron Fayziev va Mahmudxo'ja aka syomka jarayoniga yo'l olishyapti

Men va Tolibjon Qosimov (junior) svetoforda navbatimizni kutib turibmiz. Dohadagi katta chorrahalarda svetofor 7 daqiqadan kam bo'lmagan vaqtda o'chib yonadi

Istagan paytingizda Doha ko'chalaridan o'rin olgan mana shunday mashg'ulot maydonchalarida jismoniy mashqlarni bajarishingiz mumkin

2011 yil Doha ko'chalariga suniy qoplamali o't to'shalgandi. Bugungi kunda suniy maydonlarni, tabiiy maysalar egallabdi. Maysalarga alo baho bersangiz bo'ladi. Quyosh botgach, Qatarga ishlagani kelgan havaskorlar o'rtasida futbol uchrashuvlarini ko'rishingiz mumkin. Maysalar esa doimiy ravishda bir tekis o'rib boriladi

100 yillik surat o'rtasidagi farq

JCH-2022gacha shahar yanada baland binolarga ko'paysa ajablanmaymiz

Bu esa Dohaning yuzlaridan biri. Spiral shakldagi minora sayyohlar tashrif buyuradigan asosiy maskanlardan biri hisoblanadi

Bir shingil xanda... SHu suratga izoh bering, qaysidir film yodingizga tushmadimi?

Nodirxo'ja Yuldashev

Doha, Qatar