Brisben matbuoti xitoylik darvozabon qaytargan penaltiga katta etibor qaratdi

Bu o'yinda juda qiziq voqea ro'y berganidan allaqachon xabaringiz bo'lsa kerak. Vaziyatlarning birida bosh hakam Xitoy darvozasi tomon penalti belgiladi. SHunda xitoyliklar posboni Vang Daley orqasiga o'girilib maydondan tashqariga chiqib ketgan to'plarni uzatib turuvchi bolakaydan qaysi tomonga sakray deb so'radi. 12 yoshli Stiven Uyat esa chap tomonga sakra, o'sha yoqqa qarab tepadi dedi. Buni qarangki, saudiyalik Naif Hazazi to'pni o'zidan o'ng tomonga tepdi va darvozabon zarbani qaytardi.

O'yin oxirlarida esa Xitoy bitta gol urib g'alaba qozonib ketdi. Keyinchalik Vang Daleyning qanday qilib penalti qaytargani va orqasiga o'girilib 12 yoshli bolakay bilan nimalar haqida gaplashgani rosa gap-so'z bo'ldi. Biz bu paytda Sidneyda edik va ko'p gapdan xabardor emasdik. Brisbenga kelganimizdan so'ng esa shaharda chop etiladigan gazetalar shu voqeaga katta etibor berishgani etiborimizni tortdi. Xususan "The Courier Mail" nashri Stiven Uaytni salkam qahramonga chiqarib qo'ydi. Kecha televizorda ham namoyish etishdi: jurnalistlar Stivenning uyiga borib ota-onasidan intervyu olishibdi.

"Men reklama to'sig'i orqasida turgandim, - deydi bolakay. - Darvozabon o'girilib menga qaradi va to'pni qaysi tomonga tepadi deb so'radi. Men chapga sakra dedim. Saudiyalik futbolchi to'pni chindan ham men aytgan tomonga tepdi va darvozabon zarbani qaytardi. O'yindan keyin esa oldimga kelib meni tabriklab qo'ydi".

Brisbenda yashovchi Stiven Uayt ertasi kun o'tkazilgan Xitoy terma jamoasining mashg'ulotiga taklif etildi. Unga Vang Daley o'z formasini sovg'a qildi. "Osiyo chempionatida Avstraliyadan keyin Xitoyga muxlislik qilaman", - dedi maktab o'quvchisi.

X.Xoliqov.