"Bolalar futbolida natija talab qilinmaydi. Lekin...". "Surxon U-14 va "So'g'diyona U-14" murabbiylarining ilk turdan keyingi fikrlari

Gollarga boy o'tgan o'yinda termizlik yosh iqtidor sohiblari jizzaxlik tengqurlarini 8:4 hisobida mag'lubiyatga uchratdi. Mazkur bahsdan so'ng ikki jamoa murabbiylarning fikrlariga quloq tutdik.

Orif Anorov ("Surxon U-14" jamoasi bosh murabbiyi) - To'g'risi bu musobaqaga ancha vaqtdan beri tayyorgarlik ko'rib kelayotgandik. Ushbu chempionatda kuchsiz jamoa bo'lmaydi. Hamma munosib hozirlik ko'rib keladi. Bolalar keyingi yosh toifalaridagi jamoalarga shunday turnirlar orqali o'tib boradi. Darvoza chizig'da kamchiliklarimiz borligi ko'rindi. Lekin xato va kamchiliklar bo'lib turadi. Bolalarga hujumkor futbol ko'rsatishni aytgandik. Ko'rsatmalarimizni bajarishdi. O'yinimiz ustida yana ishlaymiz. Hozirda karantin va pandemiya davrida hech kimga oson emas. Biroq klub qo'lidan kelgancha barcha sharoitlarni yaratib berdi. Yig'inlar tashkillashtirildi, sport kiyimlari berildi. 

Ulug'bek Almatov ("So'g'diyona U-14" bosh murabbiyi) - Yo'ldan kelganimiz uchun biroz qiynaldik. Bolalar ochiq futbol ko'rsatishdi. O'yindan qoniqdim, lekin natijadan emas. Klub barcha sharoitlarni qilib berdi. Xudo xohlasa akademiyamiz qurilmoqda. Hammasi oldinda. To'g'ri bolalar futbolida natija talab qilinmaydi. Lekin bosqichma-bosqich bunga kelishimiz kerak. Baribir bolalarga motivaciya zarur.