Birinchi liga. 14-turda kimda imkoniyat qanday? Yoxud “Qo'qon-1912” bugun oliy ligaga chiqadimi?

“SHarq” mintaqasi ishtirokchilari o'z maydonida joriy mavsum hisobidan so'nggi o'yinini o'tkazishadi. Demak, vodiy va Toshkentdagi stadionlarda chempionat bayrog'i tushiriladi. Bo'lajak bahslar oldidan odatdagidek taxminlarimizni keltirib o'tamiz.

14-tur. 18 oktyabr (shanba)
“Istiqlol” – “SHerdor”. 60x40.
Bugun “Istiqlol” yutsa kerak. CHunki o'tgan turdagi mag'lubiyatdan keyin ularning oldida boshqa yo'l yo'q. To'g'ri, Samarqand jamoasi ham o'yinga shunchaki tashrif buyurmasligi aniq. Lekin bugun toshkentliklar katta extimol bilan g'alaba qozonadi deb o'ylaymiz.   

“Paxtakor-2” – “Alanga”. 40x60.
Bu o'yinda mehmonlarning imkoniyatini yuqori baholaymiz. Kimga qanaqa bilmadigu, “Alanga” bu yil chakki ko'rinmayapti. Anvar O'rinov boshchiligidagi jamoa safarda ham ijobiy natija bilan qaytmoqda. “Paxtakor-2”ga oson bo'lmaydi. No'mon Hasanov ham shogirdlarini g'alaba yo'lida puxta tayyorlagan bo'lsa ajab emas.

“UzDongJu” – “Zomin”. 70x30.
Andijonliklar o'tgan turda arang g'alabaga erishgandi. Raqibni mensimaslik salbiy natijalarga olib kelishini “UzDongJu” futbolchilari yaxshiroq tushunib olgan bo'lsa ajab emas. O'yinga 1 soat vaqt qolganida stadionga etib kelishi kutilayotgan “Zomin” ketma-ket ikkita texnik mag'lubiyatdan so'ng ochko jamg'arishga urinadi. Lekin bugun mezbonlar o'z maydonida muxlislarini quvontirsa kerak deb o'ylaymiz.
 
“Xotira-79” – “G'allakor-Avtomobilchi”. 50x50.
Imkoniyatlar teng. CHunki mezbonlar ham raqibni yutadigan darajada emas. “G'allakor-Avtomobilchi” ham imkon qadar safardan ochko bilan qaytishga urinadi. Uychiliklar esa o'z maydonida yutqazmaslikka urinadi.

“Obod” – “SHo'rtan”. 50x50.
“Obod” uchun sinov vazifasini o'tab beradigan o'yin deyish mumkin. Elita yo'llanmasini muddatidan oldin hal etgan “SHo'rtan”ni bor kuchi bilan o'ynashi qiyin. Har xolda o'tgan turda bizga shunday tuyuldi. Qanchalik istamang futbolchilar baribir hotirjam o'ynaydi. SHubhasiz turning markaziy o'yini. Ko'ramiz unda kimning qo'li baland kelarkin.

“Qo'qon-1912” – “Mashal-2”. 70x30.
Qo'qonliklar bugun oliy liga yo'llanmasini rasmiylashtirishi mumkin. Agarda “Mashal-2” mag'lubiyatga uchratilsa. Lekin muborakliklar ham osonlikcha taslim bo'lmasa kerak. Garchi tarkib yoshlardan iborat bo'lsada, bu jamoa bizda iliq taassurot qoldirdi. Lekin “Qo'qon-1912” o'z muxlislari qarshisida o'ynaydi. SHuni unutmaslik kerak. Qolaversa yuqorida aytib o'tganimizdek, bugungi g'alaba ularga orziqib kutilgan oliy liga yo'llanmasini taqdim etadi. Ushbu bahsni bevosita stadionda kuzatish maqsadida bugun ham Qo'qonga borishni rejalashtirganmiz.  

19 oktyabr (yakshanba)
“Oq-tepa” – “Xorazm”. 80x20.
Mazkur uchrashuvda mezbonlarning g'alabaga bo'lgan imkoniyati yuqori. CHunki urganchliklarni sensaciya qayd etishi qiyin, bizningcha. Aniqrog'i “Oq-tepa” bunga yo'l qo'ymasligi turgan gap.   

“NBU-Osiyo” – “Orol”. 40x60.
Etibor bergan bo'lsangiz ushbu turda mehmonda o'ynaydigan jamoalardan birgina “Orol”ni imkoniyatini yuqori baholadik. CHunki nukusliklar bugungi kunda “NBU-Osiyo”dan kuchli ko'rinmoqda. “Bankirlar”ni esa oliy ligadagi “Metallurg”ga qiyoslash mumkin.

Bu shunchaki bizning shaxsiy taxminlarimiz edi. Qolganini o'yin ko'rsatadi. Agarda fikrlarimiz qaysidir klub vakillarini qoniqtirmagan bo'lsa, oldindan uzur so'raymiz.
Barcha jamoaga omad tilab qolamiz!

Islombek Rustambekov.