Bir nechta futbolchilari jarohat olgani aytilgan Avstraliya mashg'ulotlarga zo'r beryapti

O'FAning dastlabki xabariga ko'ra, milliy terma jamoamiz Saudiya Arabistoniga uchishdan oldin 29 may kuni Dubayda Avstraliya termasiga qarshi o'rtoqlik uchrashuvi o'tkazishi lozim edi. Lekin nimadir bo'ldi-yu, bu o'yin bekor qilindi. O'FA matbuot xizmati buning sababini Avstraliya terma jamoasi futbolchilari jarohat olgani bilan izohlagan. 

Malumot uchun, Avstraliya terma jamoasi 25 maydan mashg'ulotlarni boshladi va shu kuni terma jamoa bosh murabbiyi Grexem Arnold 31 futbolchidan iborat tarkibni elon qildi. Mashg'ulotlarga kirishganiga endi ikki kun bo'lgan "sokkeruzlar"ning birdaniga bir nechta futbolchisi jarohat olganini o'qish negadir ishonchli chiqmayapti. CHunki ularning matbuoti butunlay teskari gaplarni aytyapti. 

Avstraliya terma jamoasining rasmiy saytida ham, Tvitterdagi akkauntida ham mashg'ulotlar zo'r ketayotgani haqida yozishmoqda, turli qiziq videolar va fotolarni berishyapti. Bundan tashqari, Avstraliya terma jamoasi saytida O'zbekiston bilan o'yin bo'lishi yoki bekor qilingani haqida shu paytgacha bir og'iz ham gap yozilmadi. Balki ularning bundan umuman xabari bo'lmagandir. Quyidagi suratlarga qarang, bir nechta futbolchisi jarohat olgan jamoaga o'xshaydimi?