Baxtiyor Ashurmatov: "Tan olaman bugun "Paxtakor" g'alabaga haqli edi"

"Juda og'ir o'yin o'tkazdik. Tan olish kerak "Paxtakor" ko'p jabhada bizdan ustun bo'ldi. Afsuski bizning jamoa tashabbusga ega bo'la olmadi, maydonda og'ir harakat qildik. Ayniqsa ikkinchi taymda to'p nazoratini butunlay "Paxtakor"ga berib qo'ydik. SHu bois o'yinni o'zgartirish uchun Sidiqovni o'rniga ikkinchi hujumchini tushirib, taktikani o'zgartirishga qaror qildik. Afsuski biz bilan o'yingacha maydonga tushmagan CHeran tuzalib bugun zaxiradan o'yinga qo'shilib gol urdi. CHeran o'zining mahoratli futbolchi ekanini yana bir bor ko'rsatdi. Tan olish kerak "Paxtakor" bugun g'alabaga haqliroq edi. Lekin biz oxirigacha kurashganimiz uchun taqdirlandik. Uchrashuv oxirida gol urganimizni inobatga oladigan bo'lsak, durang bizni qoniqtirdi, lekin "Paxtakor" g'alabaga haqliroq edi. Buni murabbiy sifatida tan olishim kerak", - dedi Baxtiyor Ashurmatov.

- Quvondiq Ro'ziev va Javohir Sidiqovning almashtirilishiga sabab nima?
- Ro'ziev yomon o'ynagani uchun almashtrilmadi. SHunchaki maydon markazini mustahkamlash maqsadida Rahmatullaevni tushirdik. Sidiqovni o'zgartirilishiga sabab esa, u jarohat bilan o'ynayapti. Bundan tashqari o'yinni o'z darvozamizdan uzoqlashtirish uchun ikkinchi hujumchini tushirdik. Bugun Murod Xolmuhammedov ham sog'ligini tavakkal qilib o'ynaganini ham qo'shimcha qilaman.

- Islom Abdullaevning holati qanday?
- Umid qilamanki keyingi o'yingacha tayyor bo'ladi. Xudodan tezroq tuzalishini so'raymiz. Ammo bizdan boshqa darvozabonlar ham bor. Muzaffar Abdullaev ham, Nodir Ashurmatov ham tayyor.

Mo'min Melievning o'yini bugun uncha yaxshi chiqmagandir. Lekin bugun penalti ishladi, himoyachilarga bosim uyushtirdi, havodagi kurashlarni yutdi. Ammo uch yarim himoyachimiz ham himoyaga yaqin o'ynagani uchun Mo'min yutib bergan to'plar raqiblarga tushdi va uning o'yini ko'rmagandir.