Baxtiyor Ashurmatov: “Raqib kuchli ekanligini maydonda isbotladi”

- Rostini aytganda, “Lokomotiv” jamoasi bugungi kunda jamoamizdan har tomonlama kuchli ekanligini maydonda isbotladi. SHu sababli, “Lokomotiv” haqqoniy g'alabani qo'lga kiritdi. Mag'lubiyatda barchamizning aybimiz bor. Yigitlarda xohish yo'q edi demagan bo'lardim. Negaki ular harakat qilishdi. O'yin boshlarida katta ishtiyoq bilan to'p surishdi. Natijada raqib darvozasi oldida bir-ikkita xavfli vaziyatlarni sodir etishdi. “Lokomotiv” jamoasi tomonidan urilgan gol esa yigitlarni ruhiy tomondan sindirib qo'ydi. SHu o'rinda muxlislarimizga qoyil qolish kerakligini aytib o'tgan bo'lardim. Garchi 0:2 hisobida yutqazayotgan bo'lsakda, jamoamizni olqishlab qo'llab-quvvatlab turishdi.

Tanaffus paytida yigitlar bilan bo'lib o'tgan suhbat paytida mayli birinchi bo'limda vaziyat shunday tarzda tus oldi. Endi esa o'yingohga kelgan ishqibozlar haqqi hurmati uchun mazmunli tarzda o'ynash kerakligi borasida ko'rsatma berdim. Futbolchilarimiz qo'llaridan kelganicha harakat qilishdi. Lekin, “Lokomotiv”ni bizdan har tomonlama kuchli ekanligini tan olish kerak. Navoiyda “Qizilqum”ga qarshi uchrashuvda ham himoyada bo'sh o'yin ko'rsatdik. SHu sababli, himoyada ayrim o'zgarishlarni amalga oshirdik. Bundan tashqari yana ikki kundan “SHo'rtan”ga qarshi chempionatdan o'rin olgan uchrashuvmiz bor. Ayrim himoyachilarimizni g'uzorliklarga qarshi o'yinga avayladik deb aytmagan bo'lardim. So'nggi paytlarda himoyadagi harakatlarimiz meni tashvishga solmoqda. Aynan shuning uchun himoyada o'zgarishlarni amalga oshirishga majbur bo'lmoqdaman.