Baxtiyor Ashurmatov: "Yigitlarni ro'zador bo'lgani uchun kuchi yo'q deya olmaymiz"

O'yin haqida

- Bugungi o'yinni stadiondan tomosha qilish uchun kelgan muxlislarni tushunib turibman. Ular bizdan g'alaba kutishgandi. Afsuski bugun mag'lubiyatga uchradik.

SHuni aytish mumkin, bugun yigitlar uchrashuvning oxiriga qadar g'alaba uchun kurashishdi. Omad biz tomonda bo'lmadi. "Metallurg" jamoasi so'ngi daqiqalarda yuzaga kelgan imkoniyatdan foydalanib gol urib ketdi. Raqib jamoani g'alaba bilan tabriklayman. Biz esa keyingi o'yinlarga jiddiy tayyorgarlik ko'rib, vaziyatni to'g'rilashimiz zarur. Bugun mag'lubiyatga uchragan bo'lsak ham yigitlarga katta etiroz bildirishim qiyin. CHunki bugun g'alabaga haqli edik, lekin omad biz tomonda bo'lmadi.

- Jamoangiz 3 ta o'yindan buyon uyda g'alaba qozona olmadi. Bunga muxlislar yaxshi qo'llab-quvvatlamayotgani sababmi?

- Yo'q, nega? Muxlislar bizni juda yaxshi qo'llab-quvvatlashmoqda. Ular bizni tinimsiz oldinga chorlashmoqda. Biz yuzaga kelayotgan vaziyatlardan unumli foydalana olmaganimiz bizga qimmatga tushayapti.

- Mo'min Melievda kuch etishmagandek ko'rindi, bugun u ro'zador edimi?

- Jamoamizda faqat Mo'min Meliev emas, bir nechta futbolchilar ro'za tutgandi. Biz yigitlarni ro'zador bo'lgani uchun kuchi yo'q deya olmaymiz. Ular bugun katta hajmdagi ishni bajarishdi, oxirigacha kurashishdi. Meliev ham bir nechta vaziyatlar yaratdi, raqib himoyasiga xavf soldi. Afsuski aytib o'tganimdek vaziyatdan foydalana olmaslik bizga pand berayapti. Uni bugun sust o'ynadi yoki kurashmadi deb ayta olmayman.

- Kubok o'yinlaridagi maqsad qanday?

- Ochig'i bu futbol, beshafqat o'yin ekanligini bugun ko'rdinglar. Bugun birinchi bo'limda mavsumdagi eng yaxshi o'yinlarimizdan birini o'tkazdik. Jamoamiz oldida har bir o'yinda g'alaba qozonish maqsadi qo'yilgan. SHu sababli biz chempionat yoki kubok doirasidagi har bir o'yinda g'alaba uchun maydonga chiqamiz.