Baxtiyor Ashurmatov: "Asabiy kechgan o'yinda muhim g'alabaga erishdik"

- O'yin haqida

- Avvalambor, o'zbekistonlik futbol muxlislarini mavsum boshlangani bilan tabriklayman! O'ylaymanki, muxlislarning sevimli jamoalari ularni xursand qilishadi. O'yin to'g'risida fikr bildirishdan avval shuni takidlab o'tgan bo'lardimki, "Turon" jamoasi 2-3 yil mobaynida har tomonlama juda katta o'sishga erishdi, katta hajmdagi ishlar va selekciya ishlari olib borildi. Men "Turon" jamoasi rahbariyatiga omad tilayman. O'ylaymanki, shuncha qilingan harakatlar albatta, meva beradi.

O'yinga kelsak, "Turon" jamoasi muxlislari bugungi derbida o'z jamoalaridan g'alaba kutishgandi. Asabiy kechgan o'yinda jamoamiz muhim g'alabaga erishdi. Buni avvalo, yigitlarimizning mehnati va keyingi navbatda omad bilan bog'lagan bo'lardim. O'z uylaridagi birinchi o'yin ekanligini inobatga olib, "Turon"dan hujumkorroq o'yin kutgan edik.

O'yinchilarimizga g'alaba uchun va havo sovuqligiga qaramasdan, Qo'qondan kelib, qo'llab-quvvatlab turgan muxlislarga minnatdorchilik bildiraman.

- Vaziyatlar ko'p bo'ldi, ammo ulardan foydalanish koefficienti past bo'ldi. Hujumchilarning o'yinidan ko'nglingiz to'ldimi?

- Hujumchilardan ko'nglim to'ldi. Agar ikkinchi golni vaqtliroq urganimizda yoki SHohnazar Norbekov va Sardor Azimov vaziyatlarni golga aylantirishganida boshqacha bo'lardi. Bizda qarshi hujumlarda ko'p imkoniyat tug'ildi, chunki "Turon" hujumga o'tganida, ayrim nuqtalar bo'sh qoldi. Hujumchilarga etirozim yo'q, lekin bundan ko'proq gol urishsa, yaxshi bo'lardi.

- Taqdimot marosimida jamoa oldiga 3-o'rinni olish vazifasi qo'yildi. SHunga bosh murabbiy sifatida jamoaning imkoniyatlarini qanday baholaysiz?

- Bilasizmi, bizda niyatga ko'p narsa bog'liq deyiladi. Masalan, "Andijon" va "Turon" jamoalari kuchli uchlikni maqsad qilganliklarini malum qilishdi. Jamoamizda yaxshi futbolchilar yig'ilgan, raqobat kuchli, ayniqsa, markazda. Hamma narsaning imkoni bor, rahbariyat va muxlislar bizga ishonch bilidirishyaptimi, demak, har bitta o'yinda g'alaba uchun maydonga tushamiz, natijasini esa mavsum yakunida ko'ramiz.

- Murod Xolmuhammedov asosan, markazda harakatlandi. Bu uning ushbu mavsumdagi asosiy poziciyasimi yoki bu jamoani tark etgan Quvondiq Ro'zievning o'rnini to'ldirish uchun qilingan ishmi?

- Yo'q, Murod Xolmuhammedov va Quvondiq Ro'ziev turlicha uslubda o'ynaydigan futbolchilar. Murod Xolmuhammedov to'p bilan yaxshi muomalada bo'lishini, birinchi pas orqali hujumlarni boshlay olishini inobatga olib, tayanch yarim himoyaga qo'ydik. Aytaylik, 3 ta markaziy himoyachi bilan o'ynasak, uni markaziy himoyaga qo'yish imkonimiz bo'ladi. Xolmuhammedov universal o'yinchi, mavsum davomida uni boshqa poziciyalarda ham o'ynatishimiz mumkin.