"Bavariya" yangi mavsumga tayyorgarlikni boshladi FOTO

Dastavval jamoani xorvatiyalik yangi bosh murabbiy Niko Kovach qabul qilib oldi va uning ishtirokida matbuot anjumani o'tkazildi. Niko Kovach "Bavariya" ustozi sifatida ilk bor matbuot anjumanida qatnashdi.

SHuningdek, matbuot anjumanida "Bavariya" sport direktori Xasan Salixamidjich ham ishtirok etdi.

SHuni qayd etib o'tish kerakki, "Bavariya"ga o'tgan mavsumni "Xoffenxaym"da ijarada o'tkazgan hujumkor vinger  Serj Gnabri ham qaytdi.  Gnabri ishtirokida ham bugun Myunxenda matbuot anjumani tashkil etildi.

Niko Kovach matbuot anjumanidan so'ng jamoa ixtiyorida bo'lib turgan futbolchilar bilan mashg'ulotlarga kirishdi. Dastlabki mashg'ulotlarda yoshlar jamoasidagi futbolchilar bilan bir qatorda asosiy tarkib azolaridan Frank Riberi, Aren Robben, Rafinya va ijaradan "Bavariya"ga qaytgan Renatu Sanshesh ishtirok etadi.

Serj Gnabri esa o'tgan mavsum oxirida olgan jarohati tufayli ilk mashg'ulotlarni o'tkazib yuboradi. SHuningdek, David Alaba ham qo'shimcha tatil kunlari tufayli jamoaga sal kechroq qo'shiladi.
Terma jamoalari bilan Jahon chempionatida ishtirok etgan futbolchilar esa yig'inga malum tanaffusdan so'ng qo'shilishadi.

Arturo Vidal va Serj Gnabri dastlab individual dastur bo'yicha shug'ullanib turishadi.

"Bavariya"ning Myunxendagi qarorgohi - Zebenershtrasseda qurilish ishlarini olib borayotgani tufayli jamoaning mashg'ulotlari 1-avgustga qadar OAV vakillari uchun "yopiq" holda o'tkaziladi.

Niko Kovach jamoa murabbiylar shtabiga avval "Bavariya"da Yupp Xaynkes yordamchisi sifatida ishlab kelgan Peter Xermannni qaytardi. Tajribali mutaxassis Peter Xermann Niko Kovachga yordamchi murabbiy sifatida ko'maklashadi.