Bahrom Haydarov: "Durang bizni ham, raqibni ham qoniqtirmadi"

- O'yin haqida fikringiz?

- Bugun olti ochkoli bahsni o'tkazdik. Chunki jamoalar turnir jadvalida bir-biriga yaqin joylashgandi. Mavsum boshidan beri kuzatib kelyapmiz, "Xorazm" to'pni nazorat qilish bo'yicha yaxshi jamoa hisoblanadi. Bugun bizga qiyin bo'ldi. To'psiz ko'roq harakat qilganimiz bos futbolchilarimiz toliqib qoldi va ko'p kuch yo'qotdik. Shunga qaramay yigitlarga oxirigacha kurash olib borishgani uchun rahmat aytmoqchiman. O'ylaymanki, durang bizni ham, raqibni ham qoniqtirmadi. Sababi uch ochko har ikki jamoaga zarur edi. Ikkala jamoada ham vaziyatlar bo'ldi. Kim gol ursa yutib ketardi.

- Jamoangiz ko'p hujum qildi, biroq xavfli vaziyatlar kam yuzaga keldi.

- To'g'ri aytdingiz, ko'p hujum qilganimiz bilan kam vaziyatlarni yuzaga keltirdik. Balki bu futbolchilarimizning to'pni oldirib qo'yishga qo'rqqani bilan bog'liq bo'lsa kerak. Xayolda yutqazib qo'ymaslik bo'ldi va bu ham o'yinga o'z tasirini o'tkazdi.

- Shahzod Beshimov nima uchundir ko'rinmay qoldi.

- Chunki u og'ir jarohat olib hozir davolanish muolajalarini olib boryapti.  Beshimov oyog'ini operaciya qildirdi va sog'ayib maydonga qaytishi uchun birmuncha vaqt kerak bo'ladi. U bu mavsum oxirigacha safdan chiqdi. Nasib qilsa kelasi mavsum jamoamizga yordam beradi.