Bahriddin Vahobov: “To'purar bo'lish uchun oxirigacha kurashaman”

Navbatdagi ikki turdan so'ng to'purar nomi malum bo'ladi. Biz esa Vahobovning bu boradagi fikrlari bilan qiziqdik.

- Igor Sergeev jamoasining “Mashal”gar qarshi o'yinidan keyin gollari sonini 21taga etkazib, bu borada sizga tenglashib oldi...
- Ha, kuzatib boryapman.

- Endi qolgan ikki turda jiddiy kurash kechsa kerak?
- Albatta. To'purarlikni saqlab qolish uchun oxirigacha kurashaman va qarab turmayman.

- Nima deb o'ylaysiz, shaxsiy yutuqqa ega chiqish uchun imkoniyatingiz qanday?
- Oldindan bir narsa deyish qiyin. Lekin xarakat qilishim aniq.

- Jamoangizning keyingi o'yinlarida maboda penalti qayd etilsa, 11 metrlik to'pni o'zingiz tepishingiz ham mumkinmi?
- (Kulib) Ko'ramiz. Avval penalti bo'lsinchi. O'yindan ham urishga bor kuchim bilan xarakat qilaman.

- Jamoadoshlaringiz ham to'purar bo'lishingizni istab, yanada ko'maklashib yuborishni aytayotgandir?
- Ha. Jamoadoshlarimning ko'magi butun mavsum mobaynida katta bo'ldi. Buning uchun ularga minnatdorchilik bildiraman. Umid qilamanki, qolgan o'yinlarda ham golli paslar oshirishadi va bu borada menga yordam beradi.

- CHempionat yakunida to'purarlikni Sergeev ilib ketsa, bu sizga alam qilsa kerak?
- Albatta. Butun mavsum mobaynida deyarli peshqadamlik qilib turib, so'nggi pallada uloqni boy berish har qanday kishiga ruhan o'z tasirini o'tkazmasdan qolmaydi. Keling yaxshi niyat qilaylik va to'purarlik poygasida g'olib chiqay.

Islombek Rustambekov suhbatlashdi.