Bahodir Nasimov endi erkin agent: shu va mavsum haqida

So'nggi turlarni oyoq paylarini tortib olganligi sababli o'tkazib yuborgan O'zbekiston milliy terma jamoasi hujumchisi bugunga kelib o'zini yaxshi xis qilyapti. Qizig'i shundaki, kubokni jamoa sardoriga topshirilgach, Rashid Saidov uni hamyurtimizga berdi. Nasimov esa katta sahnada kubokni yuqoriga ko'tardi.

- Bahodir Sizni kubok sohibi bo'lganingiz bilan tabriklaymiz!
- Rahmat! "Gabala" jamoasi bilan o'yinga qarshi jiddiy tayyorgarlik ko'rgan edik. O'yin qizg'in kurashlarga boy bo'ldi. Ammo yakunda penaltilar seriyasida g'alabani qo'lga kiritdik. "Neftchi" safida uch karra chempion, ikki karra kubok sohibi bo'ldim. Faqat superkubok qolyapti.

- Jamoangiz chempionat o'yinida aynan "Gabala" jamoasiga imkoniyatni boy berib, uchinchi o'rindan mahrum bo'ldi. Finalda revansh hissi bo'ldimi?
- Yo'q, shunchaki o'yinga tayyorgarlik ko'rdik. Mavsum boshida oldimizga ikkita turnirda ham g'olib bo'lish vazifasi qo'yilgan edi. Afsuski, chempionatda ishimiz biz o'ylagandek chiqmadi.

- Jarohatingiz tuzalib qoldimi?
- Ha, hozir mashg'ulotlarga kirishdim. Biroq jismoniy holatim avvalgidek emas. Yana bir necha kundan keyin hammasi iziga tushib ketadi.

- Endigi rejalaringiz qanday?
- "Neftchi" bilan tuzgan shartnomam yakuniga etdi. Hozir bu haqda o'ylamayapman. Bugun O'zbekistonga qaytaman, biroz hordiq chiqarishim kerak. Oldimda 3-4ta jamoadan takliflar bor.

- Sizdek hujumchilarga O'zbekiston chempionati muhtoj. Agar jamoalarimizdan biri taklif bilan chiqsa, bu haqda o'ylab ko'rasizmi?
- Bu savolingizga hozir javob bera olmayman (kuladi)

Nodirxo'ja Yuldashev